اسلام آباد،11جولائی (اے پی پی):صدر مملکت ڈاکٹر عارف علوی نے عالمی یوم آبادی پر اپنے خصوصی پیغام میں کہا ہے کہ اگر بچوں کی عمروں میں وقفہ کم ہو تو بچے سٹنٹنگ (غذائی قلت) کے مسائل کا شکار ہوتے ہیں۔ انہوں نے کہا کہ وہ آج کے دن کی مناسبت سے ماں اور بچے کی صحت کے حوالہ سے اہم بات کرنا چاہتے ہیں ۔
صدر ڈاکٹر عارف علوی نے کہا کہ اگر بچوں کی عمروں میں مناسب وقفہ نہ ہو تو اس سے ماں اور بچے کی صحت کے مختلف مسائل پیدا ہوتے ہیں اور خصوصاً بچوں کو سٹنٹنگ یعنی غذائی قلت جیسے مسائل کا سامنا ہوتا ہے۔ انہوں نے کہا کہ پاکستان تحریک انصاف کی حکومت نے ’’خیر خواہ‘‘ کے نام سے ایک خصوصی پروگرام بھی شروع کیا ہے۔ انہوں نے کہا کہ تمام پاکستانی بچوں کی عمروں میں مناسب وقفہ کی اہمیت کو اجاگر کرنے میں اپنا کردار ادا کریں۔
صدر مملکت نے کہا کہ ہمارے معاشرہ میں ماں اوربچہ کی صحت کے حوالہ سے گفتگو نہیں ہوتی۔ انہوں نے کہا کہ بچوں میں مناسب وقفہ ماں اور بچہ کی صحت کے حوالہ سے عوام میں آگاہی پیدا کرنے کےلئے ہر شہری اپنا کردار ادا کرے تا کہ پاکستان ایک خوشحال ملک بنے اور ہمارے خاندانوں میں خوشحالی آئے۔
