لاہور ،17جولائی(اے پی پی): چیئرمین سینٹ صادق سنجرانی کی قیادت میں سینیٹر کے وفد نے وزیر اعلی پنجاب سردار عثمان بزدار سے ملاقات کی ہے ، ملاقات میں باہمی دلچسپی کے امور پر گفتگو کی گئی۔
وفد نے پنجاب کا بہترین اور عوام دوست بجٹ پیش کرنے پر وزیر اعلی عثمان بزدار کے ویژن کو سراہا ، چیئرمین سینٹ اور وفد نے وزیر اعلی عثمان بزدار کے ہر ضلع کی یکساں ترقی کیلئے خصوصی ڈویلپمنٹ پیکیج کے اقدام کی تعریف کی۔
اس موقع پر چیئرمین سینٹ اور وفد نے بلوچستان کی تعمیر و ترقی کے منصوبوں کیلئے بھرپورتعاون پروزیراعلیٰ عثمان بزدار اورپنجاب حکومت کا شکریہ بھی ادا کیا۔
ملاقات میں گفتگو کرتے ہوئے سردار عثمان بزدار کا کہنا تھا کہ پاکستان کی ساری اکائیاں ایک لڑی میں پروئی ہوئی ہیں اور ہمارے دکھ سکھ سانجھے ہیں۔ پنجاب کے ساتھ دیگر صوبے بھی ترقی کریں گے تو پاکستان آگے بڑھے گا جبکہ ترقی کے سفر میں ہم اپنے بھائیوں کو ساتھ لے کر چل رہے ہیں۔انہوں نے کہا کہ پنجاب اور بلوچستان کے لوگ ایک دوسرے سے دلی لگاؤرکھتے ہیں۔ بلوچستان کی ترقی پاکستان کی ترقی ہے ،بلوچستان میں بسنے والے بہن بھائیوں کے مسائل ہمارے مسائل ہیں۔
وزیراعلیٰ عثمان بزدارنے چیئرمین سینیٹ اور وفد کو پنجاب کے مزید ترقیاتی منصوبوں اور سماجی ترقی کیلئے کئے گئے اقدامات سے بھی آگاہ کیا اور سینٹ کی کارروائی کو احسن انداز سے چلانے پر چیئرمین سینٹ صادق سنجرانی کے کردار کو سراہا۔
چیئرمین سینیٹ کا کہنا تھا کہ وزیراعلیٰ عثمان بزدار نے بین الصوبائی ہم آہنگی کے لئے قابل تحسین اقدامات کئے ہیں۔ بلوچستان کے لوگوں کے مسائل کے حل کیلئے وزیراعلیٰ عثمان بزدارکے اقدامات ہر لحاظ سے قابل تعریف ہیں۔انہوں نے کہا کہ ملکی ترقی کیلئے وفاق اور صوبوں کے مابین ہم آہنگی مزید بڑھانے کی ضرورت ہے۔ایوان بالا اس حوالے سے اپنا کلیدی کردارادا کرتا رہے گا۔
نو منتخب سینیٹر عبدالقادر نےکہا کہ وزیر اعلی عثمان بزدار نے پنجاب کو یکساں ترقی کا نیاروڈ میپ دیا ہے جبکہ سینیٹر دلاور خان کا کہنا تھا کہ وزیر اعلی عثمان بزدار نے ماضی کی جعلی ترقی کی بجائے صوبے کے عوام کی حقیقی ترقی کے لئے پائیدار اقدامات کئے ہیں۔
سینیٹر سرفراز بگٹی نے کہا کہ وزیر اعلی عثمان بزدار کی قیادت میں پنجاب کے پسماندہ اضلاع کی پہلی بار قسمت بدل رہی ہے اور بلوچستان کی تعمیر و ترقی کے لئے بھی وزیر اعلی عثمان بزدار کی قیادت میں پنجاب حکومت گرانقدر تعاون کر رہی ہے جو کہ حقیقتاً قابل تحسین ہے۔
