لاہور، 27 جولائی (اے پی پی): وزیراعلیٰ پنجاب سردار عثمان بزدار سے صوبائی وزیر جنگلات محمد سبطین خان نے ملاقات کی۔ ملاقات میں باہمی دلچسپی کے امور، محکمہ جنگلات کی کارکردگی اور سیاسی صورتحال پر تبادلہ خیال کیا گیا۔
وزیراعلیٰ پنجاب سردار عثمان بزدار نے آزاد کشمیر الیکشن میں پاکستان تحریک انصاف کی شاندار کامیابی پر وزیر اعظم عمران خان کو مبارکباد دی اور کہا کہ آزاد کشمیر الیکشن کے نتائج مخالف جماعتوں کے لئے نوشتہ دیوار ہے ،نتائج نے ثابت کر دیا کہ پی ٹی آئی ملک بھر کی مقبول ترین جماعت ہے۔
وزیر اعلی نے کہا کہ ووٹ کو عزت دو کا کھوکھلا نعرہ اپنی موت آپ مرچکا ہے، اب ملک ترقی کر رہا ہے۔انہوں نے کہا کہ موجودہ حکومت نے جنگلات کے حوالے سے پراٹیکٹڈ ایریا ایکٹ اور فاریسٹ پالیسی منظور کرائی ہے،گذشتہ برس مون سون سیزن میں 6 کروڑ اور رواں سال 12کروڑ پودے لگائے جائیں گے۔
وزیر اعلیٰ عثمان بزدار نے کہا کہ ہماری حکومت نے محکمہ جنگلات کی 14 ہزار ایکڑاراضی واگزارکرائی اوراس زمین کو شجرکاری کیلئے استعمال میں لایا جارہا ہے، سابق دور میں درختوں کو بے دریغ کاٹا گیا جس سے ماحولیاتی آلودگی میں اضافہ ہواصوبے بھر میں 600 سے زائد نرسریاں قائم کی گئی ہیں۔
اس موقع پر صوبائی وزیر جنگلات محمد سبطین خان نے کہا کہ آزاد کشمیر الیکشن میں پی ٹی آئی کی کامیابی، شفافیت اور ایمانداری کی جیت ہے، ایک طرف شفاف اور ایماندار قیادت ہے اور دوسری طرف عبرت کی تصویر بنے سابق حکمران جنگلات کے تحفظ کے لئے پہلی مرتبہ پروٹیکٹڈ ایریاز کا رقبہ بڑھایا جا رہا ہےاور صوبے میں 5نئے نیشنل پارکس ڈکلیئر کئے جا رہے ہیں۔
