اسلام آباد، یکم اگست(اے پی پی):آئی جی اسلام آباد قاضی جمیل الرحمان نے پولیس اہلکاروں کو ہدایت کی ہے کہ شہریوں سے ہر حال میں شائستگی سے مہذب انداز میں پیش آئیں،قوانین کی پاسداری ضرور ہونی چاہیے مگر اخلاق کا دامن کبھی نہ چھوڑیں۔
یہ ہدایات آئی جی اسلام آباد قاضی جمیل الرحمان نے اتوار کو یہاں ٹریفک ہیڈکوارٹرز میں منعقدہ پولیس دربار سے خطاب میں دیں۔
ٹریفک افسران و جوانوں سے خطاب میں آئی جی اسلام آباد نے کہا کہ ٹریفک پولیس کے تمام افسران و جوان دن رات شہریوں کی خدمات میں کوشاں ہیں اور سردی ،گرمی، بارش،طوفان میں اپنے فرائض منصبی انجام دہی میں پیش پیش ہیں جو قابل تحسین ہیں۔انہوں نے کہا کہ ٹریفک پولیس ادارے کا چہرہ ہے، شہریوں سے خوش اخلاقی کو یقینی بنائیں، ٹریفک کے افسران و جوانوں کو خوبصورت وردی پہن کر کھڑا ہونا چاہیے۔
آئی جی اسلام آباد نے کہا کہ دوسرے اضلاع سے آنے والے شہریوں کے ساتھ نرمی اور اخلاق سے پیش آئیں تاکہ وہ اپنے علاقوں میں جاکر آپ کی تعریف کریں، قوانین کی پاسداری ضرور ہونی چاہیے مگر اخلاق کا دامن کبھی نہ چھوڑیں۔انہوں نے کہا کہ لائسنس حاصل کرنے کے لئے شہریوں کو اپنی اہلیت ثابت کرنی ہوگی جبکہ شہریوں کے لیے زیادہ سے زیادہ آسانیاں پیدا کریں، انسانیت کی فلاح کے لئے ہم سب کو ملکر کوششیں کرنی ہیں۔
قاضی جمیل الرحمان نے اپنے خطاب میں کہا کہ آپ کی ایک معمولی غلطی بھی پورے محکمے کے لئے بدنامی کا باعث بن جاتی ہے، آپ کا ایک اچھا کام محکمے کے معیار کو بلندیوں تک پہنچانے کے لئے کافی ہے۔
انہوں نے ٹریفک افسران و جوانوں سے کہا کہ یاد رکھیں یہ دنیا کی زندگی عارضی زندگی ہے، اپنی اصل زندگی کے لیے بہت کچھ کرنے کی ضرورت ہے۔انہوں نے کہا کہ مجھے خوشی ہے کہ وسائل کی کمی کے باوجود آپ سب بہت محنت اور لگن کے ساتھ کام کررہے ہیں۔
آئی جی اسلام آباد قاضی جمیل الرحمان نے پولیس اہلکاروں کو ہدایت کی کہ ٹریفک قوانین پر عملدرآمد کو یقینی بنائیں اور ٹریفک کی روانی کو بحال رکھنے کے لیے ہر ممکن کوشش کریں، چوراہوں میں ٹریفک کے جوانوں کے لیے بنائی گی پوسٹس خوبصورت ہونی چاہیے۔انہوں نے کہا کہ وفاقی دارالحکومت میں داخل ہوتے ہی شہریوں کو معلوم ہو کہ اب غلطی کی گنجائش نہیں، ٹریفک قوانین پر عملدرآمد کرنا ہے۔
انہوں نے ایس ایس پی ٹریفک کو افسران و جوانوں کو ڈیوٹی کے دوران تمام ضروری سہولیات فراہم کرنے کی بھی ہدایت کی۔
دربار میں سینئیر افسران اور جوانوں نے بڑی تعداد میں شرکت کی۔آئی جی اسلام آباد نے انکے مسائل سنے اور حل کرنے کی یقینی دہانی کروائی، افسران و جوانوں نے ذاتی و سرکاری مسائل اور محکمہ کی بہتری کے لئے اپنی تجاویز پیش کیں۔
