مظلوم کی داد رسی پولیس کا بنیادی فرض بھی ہے اور ذمہ داری بھی،عوام کے جان و مال کے تحفظ کے لئے سرگرم عمل پولیس افسران ہمارے ہیرو ہیں : سردارعثمان بزدار

لاہور یکم ستمبر (اے پی پی):وزیراعلیٰ پنجاب سردار عثمان بزدار سے عوام کے جان و مال کے تحفظ اور امن و امان کیلئے بہترین کارکردگی کا مظاہرہ کرنے والے پولیس افسروں نے ملاقات کی۔ ملاقات میں  وزیر اعلی پنجاب سردارعثمان بزدار نے پولیس افسروں کی کارکردگی کو سراہا اور تعریفی سر ٹیفکیٹ بھی دیئے۔وزیر اعلی  نے ڈیرہ غازی خان ڈویژن کے 7 پولیس افسروں کو وزیر اعلی آفس بلا کرحوصلہ افزائی کی اور امن عامہ کے لئے شاندار کارکردگی پر پولیس افسروں کو شاباش دی۔وزیراعلیٰ پنجاب سردار عثمان بزدار نے آرپی او ڈی جی خان محمد  فیصل رانا،ڈی پی او عمر سعید ملک،ایس پی انویسٹی گیشن  حسن جاوید بھٹی ، ڈی ایس پی صدر سرکل ناصر علی ثاقب، سب انسپکٹر جعفر حبیب  ، اے ایس آئی جواد احمد اوراے ایس آئی ارشد علی کو تعریفی سرٹیفکیٹ دیئے۔اس موقع پر گفتگو کرتے ہوئے وزیراعلیٰ پنجاب سردار عثمان بزدار نے کہا  کہ عوام کے جان و مال کے تحفظ کے لئے سرگرم عمل پولیس افسران ہمارے ہیرو ہیں،ایسے پولیس افسران پنجاب پولیس کے ماتھے کا جھومر ہیں،حکومت بہترین کارکردگی دکھانے والے پولیس افسران کی حوصلہ افزائی جاری رکھے گی،انہوں نے کہا کہ مظلوم کی داد رسی پولیس کا بنیادی فرض بھی ہے اور ذمہ داری بھی،آرپی او ز اور ڈی پی او ز سمیت پولیس افسر تھانوں کی موثر مانیٹرنگ جاری رکھیں،۔انہوں نے مزید کہا کہ ہر ضلع میں خواتین پر تشدد کے سد باب کیلئے خصوصی سیل قائم کئے گئے ہیں -اس موقع پر  انسپکٹر جنرل پنجاب پولیس انعام غنی نے کہا کہ  تھانوں  کے لاک اپ، فرنٹ ڈیسک اور ایس ایچ او کے دفتر کو کیمرے سے مانیٹر کیا جا رہا ہے،کورونا ایس او پیز کے مطابق دوبارہ کھلی کچہریاں شروع کررہے ہیں