اسلام آباد۔10ستمبر (اے پی پی):وفاقی وزیر اطلاعات و نشریات چوہدری فواد حسین نے کہا ہے کہ موجودہ بحران میں افغان عوام کو تنہا نہیں چھوڑیں گے، افغانستان تک رسائی کے لئے پاکستان اہم کوریڈور ہے، ہم کوشش کر رہے ہیں کہ افغانستان میں انسانی المیہ پیدا نہ ہو، پاکستان انسانی ہمدردی کی بنیادوں پر افغان عوام کی ہر ممکن مدد کرے گا، سینکڑوں صحافی کابل میں پھنسے ہوئے تھے جنہیں کابل سے انخلاءمیں مدد فراہم کی، پاکستان اور کیوبا کی نیوز ایجنسیوں کے مابین خبروں کے تبادلہ سے دونوں ممالک کے تعلقات مزید مستحکم ہوں گے، پاکستان کیوبا کے ساتھ اپنے تعلقات کو قدر کی نگاہ سے دیکھتا ہے۔ ان خیالات کا اظہار انہوں نے جمعہ کو یہاں پاکستان کی قومی نیوز ایجنسی ایسوسی ایٹڈ پریس آف پاکستان (اے پی پی) اور کیوبا کی نیوز ایجنسی پرسینا لیٹینا کے مابین مفاہمت کی یادداشت پر دستخطوں کی تقریب سے خطاب کرتے ہوئے کیا۔ وفاقی وزیر اطلاعات چوہدری فواد حسین نے کہا کہ آج ایک اہم اور تاریخی دن ہے، کیوبا اور پاکستان کی نیوز ایجنسیوں کے مابین خبروں کے تبادلے سے دونوں ممالک کے تعلقات مزید مستحکم ہوں گے۔ انہوں نے دونوں خبر رساں اداروں کو مفاہمت کی یادداشت پر دستخط کرنے پر مبارکباد پیش کرتے ہوئے کہا کہ دونوں ممالک ایک دوسرے کو درپیش مسائل اور چیلنجز کو بخوبی سمجھتے ہیں۔ انہوں نے کہا کہ پاکستان کیوبا کے ساتھ تعلقات کو قدر کی نگاہ سے دیکھتا ہے جو باہمی اعتماد، احترام اور دیرینہ دوستی پر مبنی ہیں۔ چوہدری فواد حسین نے کہا کہ وزارت اطلاعات کے ایکسٹرنل پبلسٹی ونگ کو جدید دور کے تقاضوں کے مطابق ہم آہنگ کیا گیا ہے۔ ایکسٹرنل پبلسٹی ونگ نے افغانستان میں اب تک غیر ملکی میڈیا کو 250 ویزے اور 85 بارڈر کراسنگ این او سیز جاری کیں۔ انہوں نے کہا کہ سینکڑوں صحافی کابل میں پھنسے ہوئے تھے جنہیں انخلا میں مدد فراہم کی گئی۔ وفاقی وزیر اطلاعات نے کہا کہ کابل سے غیر ملکی میڈیا کے افراد کو نکالنے کی کوششوں میں کابل میں موجود ہمارے سفارتی عملہ نے گراں قدر خدمات انجام دیں، ہماری ان کوششوں کو عالمی میڈیا پر سراہا جا رہا ہے۔ چوہدری فواد حسین نے کہا کہ پاکستان انسانی ہمدردی کی بنیادوں پر افغان عوام کو ہر ممکن مدد فراہم کرے گا، موجودہ بحران میں افغان عوام کو تنہا نہیں چھوڑیں گے۔ انہوں نے کہا کہ افغانستان تک رسائی کے لئے پاکستان اہم کوریڈور ہے۔ وزیراعظم کی ہدایات کے تحت حکومت اور وزارت اطلاعات افغانستان سے غیر ملکی شہریوں کے انخلاءمیں بھرپور مدد کر رہے ہیں، اس وقت ہمارا ایک سی ون تھرٹی طیارہ کابل میں موجود ہے۔ انہوں نے کہا کہ ہم کوشش کر رہے ہیں کہ افغانستان میں انسانی المیہ پیدا نہ ہو۔ انہوں نے کہا کہ ہم افغانستان کے عوام کو یقین دلانا چاہتے ہیں کہ پاکستان ان کی ہر ممکن مدد کرے گا۔ تقریب سے خطاب کرتے ہوئے کیوبا کے سفیر زینیئر جیویئر کیرو گونزیلز نے کہا کہ جعلی نیوز کا مسئلہ کیوبا کو بھی درپیش ہے۔ اے پی پی کے ساتھ خبروں کے تبادلے سے دونوں ممالک کے درمیان اطلاعات کے شعبہ میں تعلقات مزید مستحکم ہوں گے۔ انہوں نے کابل سے غیر ملکی شہریوں کے انخلا میں مدد کرنے پر پاکستان کا شکریہ ادا کرتے ہوئے کہا کہ افغان عوام کے لئے خوراک اور ادویات کا سلسلہ شروع کرنا قابل ستائش ہے۔ مفاہمت کی یادداشت پر کیوبا کے سفیر زینئر جیویئر کیرو گونزیلز اور قومی خبر رساں ادارہ ایسوسی ایٹڈ پریس آف پاکستان کے منیجنگ ڈائریکٹر مبشر حسن نے دستخط کئے۔ اس موقع پر سیکریٹری اطلاعات شاہیرہ شاہد اور وزارت کے دیگر اعلیٰ افسران بھی موجود تھے۔
