اسلام آباد، 15 ستمبر (اے پی پی ): وزیر دفاع پرویز خٹک نے کہا ہے کہ افغان مسئلے کا پرامن ، پائیدار حل تلاش کرنے کے لیے بین الاقوامی برادری پر زور دینے کی ضرورت ہے، پاکستان علاقائی اور عالمی امن کے فروغ کے لیے پرعزم ہے اور اپنا کردار ادا کرتا رہے گا۔
ان خیالات کا اظہار وزیر دفاع نے بدھ کو یہاں جمہوریہ بلغاریہ کے وزیر دفاع جارجی پنیاتوف سے ملاقات کے دوران کیا، ملاقات میں گفتگو کرتے ہوئے وزیر دفاع پرویز خٹک کا کہنا تھا کہ پاکستان بلغاریہ کے ساتھ اپنے تعلقات کو بہت اہمیت دیتا ہے اور ان کے درمیان قریبی ہم آہنگی اور تعاون باہمی دلچسپی کے تمام شعبوں بشمول دفاع میں مزید فروغ چاہتا ہے۔
پرویز خٹک نے کہا کہ اب وقت آگیا ہے کہ دنیا افغان عوام کی مکمل حمایت اور یکجہتی کے ساتھ کھڑی ہو۔انہوں نے کہا کہ پاکستان اس بات پر زور دیتا ہے کہ تمام افغان دھڑوں کی نمائندگی کرنے والا ایک جامع سیاسی حل واحد قابل عمل آپشن ہے اور دنیا کو افغان عوام کو اس مقصد کے لیے کام کرنے کی ترغیب دینی چاہیے۔
وزیر دفاع نے کہا کہ پاکستان کی معاشی مصروفیات اور ترقیاتی حکمت عملی کا کوئی فوجی یا جارحانہ ڈیزائن نہیں ہے۔
بلغاریہ کے وزیر دفاع جارجی پنیاتوف نے امن کے لیے پاکستان کی کوششوں کو سراہتے ہوئے کہا کہ بلغاریہ اور پاکستان دونوں کو مل کر خطے میں امن اور سلامتی کے مشترکہ ہدف کے حصول کے لیے کام کرنا چاہیے۔ انہوں نے دونوں ممالک کے درمیان جاری دفاعی تعاون پر مکمل اطمینان ،اپنی حکومت کی یقین دہانی اور اس عزم کا اعادہ کیا کہ وہ دونوں ممالک کے مابین دو طرفہ تعاون کے کو مزید مضبوط بنانے کے لیئے پاکستان کے ساتھ مل کر کام کریں گے۔
