لاہور،20 نومبر(اے پی پی): وزیر اعلیٰ پنجاب سردار عثمان بزدار نے کہا ہے کہ ماضی میں پسماندہ علاقوں میں صحت عامہ کی سہولیات کا فقدان رہا، موجودہ حکومت ہسپتالوں کی آپ گریڈنگ کے ساتھ ساتھ نئے مدَر اینڈ چائلڈ ہسپتال بنا رہی ہے۔
ان خیالات کا اظہار انہوں نے ہفتہ کو یہاں اعلی سطحی اجلاس کی صدارت کرتے ہوئے کیا ،اجلاس میں صوبے کے عوام کو ہیلتھ کیئر کی معیاری سہولتیں فراہم کرنے کے جاری پروگرام کاجائزہ لیا گیا۔ وزیراعلیٰ عثمان بزدار نے ہیلتھ کیئر کی معیاری سہولتوں کی فراہمی کے لئے ہر ممکن اقدام اٹھانے کی ہدایت کرتے ہوئے کہا کہ پسماندہ علاقوں کے ہسپتالوں میں سروس ڈلیوری میں بہتری لائیں گے،ہسپتال میں ہر مریض کوعلاج معالجے کی معیاری سہولتوں کی فراہمی یقینی بنائیں گے۔انہوں نے کہا کہ سابق دور میں پسماندہ علاقے صحت کی سہولیات کے لحاظ سے بھی پسماندہ رکھے گئے جبکہ ہماری حکومت نے معیاری ہیلتھ کیئر کے لئے یکساں پالیسی اپنائی ہے۔
عثمان بزدار نے کہا کہ ملتان میں نشتر ٹو، رحیم یار خان میں شیخ زید ہسپتال ٹو اور ڈیرہ غازی خان میں کارڈیالوجی انسٹی ٹیوٹ کا قیام عمل میں لایا جا رہا ہے، پنجاب کی تاریخ میں پہلی بار دور دراز علاقوں میں مدر اینڈ چائلڈ ہسپتال بنائے جا رہے ہیں، مدر اینڈ چائلڈ ہسپتالوں کے منصوبے ماں و بچے کی صحت کے لئے انتہائی اہمیت کے حامل ہیں۔انہوں نے کہا کہ ماضی کے ادوار میں صحت کا کوئی قابل ذکر منصوبہ مکمل نہ ہو سکاجس کی وجہ سے ماں اور بچے کی شرح اموات میں اضافہ ہوا اور ہماری حکومت نے شعبہ صحت میں انقلابی اصلاحات متعارف کرائی ہیں، ان اصلاحات کا مقصد ہسپتالوں میں عوام کو معیاری ہیلتھ کیئر فراہم کرنا ہے، تین سال میں شعبہ صحت کے مجموعی بجٹ میں 118 فیصد اضافہ کیا گیا ہے۔
اجلاس میں وزیر اعلیٰ عثمان بزدار کو سیکرٹری سپیشلائزڈ ہیلتھ کیئر اینڈ میڈیکل ایجوکیشن نے صوبے میں جاری ہیلتھ پراجیکٹس کے بارے میں بریفنگ بھی دی۔ صوبائی وزیر صحت ڈاکٹر یاسمین راشد، چیئرمین منصوبہ بندی وترقیات، پرنسپل سیکرٹری وزیر اعلی، سیکرٹری خزانہ،سیکرٹری سپیشلائزڈ ہیلتھ کیئر اینڈ میڈیکل ایجوکیشن، سیکرٹر ی پرائمری اینڈ سیکنڈری ہیلتھ،سیکرٹری بلدیات اور دیگر متعلقہ حکام بھی اجلاس میں شریک ہوئے۔
