اسلام آباد۔23نومبر (اے پی پی):وزیر داخلہ شیخ رشید احمد نے کہا ہے کہ امن امان کے حوالے سے مجموعی طور پر پاکستان پر امن ملک ہے، گوادر دنیا کی بہترین گہرے سمندر کی بندر گاہ ہے۔ گوادر بلوچستان کا نقشہ تبدیل کردے گا، صوبہ بلوچستان پاکستان کی ترقی کا راستہ ہے، صوبے میں سرمایہ کاری کے بے پناہ مواقع ہیں۔ وہ منگل کو آٹھویں نیشنل ورکشاپ بلوچستان کے شرکاء سے خطاب کر رہے تھے۔ وزیر داخلہ نے کہا کہ صوبہ بلوچستان پاکستان کی ترقی کا راستہ ہے، صوبے میں سرمایہ کاری کے بے پناہ مواقع ہیں، گوادر دنیا کی بہترین گہرے سمندر کی بندر گاہ ہے، گوادر بلوچستان کا نقشہ تبدیل کردے گا۔ انہوں نے کہا کہ امن و امان کے حوالہ سے مجموعی طور پر پاکستان پرامن ملک ہے، بلوچستان میں جغرافیہ کے حوالے سے امن وامان ایک بڑا چیلنج ہے، سرمایہ کارصرف امن و امان کو دیکھتا ہے،ہم نے ساز گار ماحول پیدا کیا ہے۔ انہوں نے کہا کہ پاکستان نے افغانستان میں پائیدار امن کے لئے کلیدی کردار ادا کیا ہے، ہم نے تقریباً ایک لاکھ افغان شہر یوں کوافغانستان سے نکلنے میں مدد دی ، پاکستان انسانی ہمدردی کی بنیادوں پر طالبان حکومت کی مدد کررہاہے، دنیا کو طالبان حکومت کو وقت دینا چاہئے،افغانستان کے حالات چند دنوں میں تبدیل نہیں ہوسکتے۔ انہوں نے کہا کہ معاملات مذاکرات سے حل ہونے چاہئیں،امن امان کے لئے ہم نے 80 ہزار جانوں کی قربانی دی، دہشت گردی کی جنگ میں پاکستان نے 150 ارب ڈالر کا معاشی نقصان اٹھایا۔ انہوں نے کہا کہ افغان مہاجرین کی واپسی کا زیادہ انحصار افغانستان کے معاشی حالات کی بہتری پر ہے، 40لاکھ افغان مہاجرین کی چار دہائیوں سے دیکھ بھال کر رہے ہیں۔ انہوں نے کہا کہ بلوچستان حکومت کو امن و امان کے لئے ضروری وسائل اور تکنیکی معاونت فراہم کر رہے ہیں۔ اس موقع پر سوال و جواب کا سیشن بھی ہوا جس میں ورکشاپ کے شرکاء نے وزیر داخلہ شیخ رشید احمد سے سوالات بھی کئے۔ ورکشاپ کے اختتام پر یادگاری شیلڈز کا تبادلہ کیا گیا۔ورکشاپ کے شرکاء نے وزیر داخلہ شیخ رشید احمد سے ان کے بڑے بھائی کی وفات پر تعزیت اور ایصال ثواب کے لئے دعا بھی کی۔ نیشنل ورکشاپ بلوچستان کا انعقاد سدرن کور بلوچستان نے کیا۔
