اسلام آباد،25نومبر (اے پی پی):وفاقی وزیر برائے غذائی تحفظ و تحقیق سیّد فخر امام نے کہا ہے کہ حکومت نے ملکی ضرورت پوری کرنے کے لیے 6 ملین ٹن گندم خریدی، آج ہمارے پاس 5.3 ملین ٹن کے ذخائر موجود ہیں جبکہ 13 لاکھ ٹن گندم درآمد کرنے کے لیے بک کروا لی گئی ہے جس کے بعد ہمارے ذخائر 6.6 ملین ٹن ہو جائیں گے، گندم کا ذخیرہ کافی مقدار میں موجود ہے۔
ان خیالات کا اظہارانہوں نے وزیر صنعت و پیداوار خسرو بختیار کے ہمراہ جمعرات کو اہم پریس کانفرنس سے خطاب کرتے ہوئے کیا۔ وفاقی وزیر سیّد فخر امام نے کہا کہ ہمارے پاس ملکی ضرورت پوری کرنے کے لیے گندم کے وافر ذخائر موجود ہیں، مقامی ضرورت پوری کرنے کے لیے 1.9 ملین ٹن گندم درآمد کرنے کی منظوری دی گئی تھی جس میں سے 13لاکھ ٹن بک ہو چکی ہے ، جس سے ہمارے ذخائر 6.6ملین ٹن ہو جائیں گے۔ انہوں نے کہاکہ وفاق نے صوبوں کی صورتحال کو مد نظر رکھتے ہوئے گندم کی فی من امدادی قیمت 1950روپے مقرر کی ، سندھ نے گندم کی فی من قیمت 2200روپے مقرر کرنے کا اعلان کیا جس سے قیمتوں میں عدم توازن پیدا ہوا اور سندھ میں مہنگائی میں تیزی آئی اور آٹے کا تھیلا باقی صوبوں کے مقابلے میں مہنگا ہو گیا ۔ انہوں نے کہاکہ سندھ حکومت نے دو دفعہ ایسا رویہ اختیار کیا ہے جو کہ زیادتی ہے ۔ ان کی امدادی قیمت ہمیشہ 20-25 روپے زیادہ ہے جو عام آدمی کو ادا کرنی پڑتی ہے ۔
وفاقی وزیر نے کہا کہ صوبہ کے پی کے میں 1100 روپے میں ملنے والا آٹے کا تھیلا کراچی میں 1400روپے کا مل رہا ہے ۔ انہوں نے کہاکہ حکومت نے وزیراعظم عمران خان کی قیادت میں زرعی پیداواربڑھانے پر خصوصی توجہ مرکوز کی ہوئی ہے جس کے باعث رواں سیزن کے دوران گندم کی پیداوار کا ہدف 28.9ملین ٹن مقرر کیا گیا ہے جو گزشتہ سیزن کے دوران 27.5ملین ٹن تھا ، حکومتی اقدامات کے باعث ریکارڈ پیداوار حاصل ہو رہی ہے اور ہر ہفتے قیمتوں کی نگرانی کا نظام قائم کیا گیا ہے تاکہ قیمتوں کو متوازن رکھا جائے۔
