کوئٹہ، 27 نومبر(اے پی پی): وزیراعلیٰ سردار عثمان بزدار نے کہا ہے کہ پنجاب ، بلوچستان کی ہر شعبہ میں معاونت جاری رکھے گ،ا ہم بلوچستان کو اپنا دوسرا گھر سمجھتے ہیں اور بلوچستان کے عوام بھی پنجاب کو اپنا گھر سمجھیں ۔
ان خیالات کا اظہار انہوں نے ہفتہ کو یہاں وزیراعلیٰ سیکریٹریٹ آمد پر وزیراعلیٰ بلوچستان میر عبدالقدوس بزنجو کی قیادت میں صوبائی وزراء اور اراکین صوبائی اسمبلی سے ملاقات میں کیا۔ ملاقات میں ڈپٹی اسپیکر قومی اسمبلی قاسم خان سوری اور حزب اختلاف کے اراکین صوبائی اسمبلی بھی موجود تھے ۔
اس موقع پر وزیر اعلیٰ پنجاب سردار عثمان بزدار نے کہا کہ بلوچستان کے عوام اور عوامی نمائندوں کو پنجاب میں ہمیشہ بھرپور عزت و احترام ملے گا اور ہم بلوچستان کے دیگر اضلاع میں بھی اسپتال بنا کر دینگے۔انہوں نے پنجاب کی یونیورسٹیوں میں بلوچستان کی طالبات کیلئے مختص نشستیں دگنا کرنے کا بھی اعلان کیا۔
وزیر اعلیٰ بلوچستان میر عبدالقدوس بزنجو نے کہا کہ ہم نے مل کر پاکستان اور اپنے صوبوں کی خدمت کرنا ہے اور بلوچستان کے عوام صحت مواصلات تعلیم سمیت دیگر شعبوں میں پنجاب کے تعاون کو قدر کی نگاہ سے دیکھتے ہیں۔ا نہوں نے کہا کہ وزیراعلیٰ سردار عثمان بزدار کے دور حکومت میں دونوں صوبوں کے مابین معاونت میں اضافہ ہوا ہے۔
