کراچی،28نومبر (اے پی پی):وزیراعظم آزاد جموں کشمیر سردار عبدالقیوم نیازی نے کہا ہے کہ وزیراعظم عمران خان آزادکشمیر کی تعمیر وترقی میں گہری دلچسپی رکھتے ہیں، اس وقت مقبوضہ کشمیر میں قیامت صغری برپا ہے، کوئی گھر ایسا نہیں جہاں سے شہادت نہ ہوئی ہو، بھارت جس بے دردی سے کشمیریوں کو ماورائے عدالت قتل کر رہا ہے اور انسانی حقوق کی دھجیاں اڑا رہا ہے اسے عالمی عدالت انصاف کے کٹہرے میں کھڑا کرنے کی ضرورت ہے ،مقبوضہ کشمیر کے عوام کی امید عمران خان ہیں، قوم ان کے ہاتھ مضبوط کرے۔
ان خیالات کا اظہار انہوں نے دو روزہ دورے پر کراچی پہنچنے کے بعد سندھ اسمبلی میں اپوزیشن لیڈر حلیم عادل شیخ کی رہائش گاہ پر صحافیوں سے گفتگو کرتے ہوئے کیا۔وزیراعظم آزاد و جموں کشمیر سردار عبدالقیوم نیازی نے کہا کہ عمران خان نے 3 سو بلین کا پیکیج گلگت بلتستان کو دیا جس سے وہاں ترقی کا نیا دور شروع ہو گا۔ انہوں نے کہا کہ مقبوضہ کشمیر میں ہمارے بھائی مظالم کا سامنا کررہے ہیں وہ جس ہمت اور جرات سے بھارتی مظالم برداشت کر رہے ہیں اس پر انہیں خراج تحسین پیش کرتا ہوں کہ بھارت کے تمام تر ظالمانہ ہتھکنڈوں کے باوجود ان کا جذبہ آزادی کم نہیں ہوا ہے۔
وزیراعظم آزاد جموں کشمیر سردار عبدالقیوم نیازی نے کہا عمران خان نے ایل او سی سے میرا انتخاب کر کے بھارت کو واضح پیغام دیا ہے کہ کشمیری اس کی جارحیت سے مرعوب نہیں ہوئے نہ آئندہ ہونگے۔انہوں نے کہا کہ میرا گز بھارتی توپوں کے سامنے ہے،میں آج بھی اس ایل او سی پر رہتا ہوں جس کا مقصد صرف مقبوضہ کشمیر کے لوگوں کو پیغام دینا ہے کہ آپ جدوجہد آزادی میں تنہا نہیں ہیں ہم آپ کے شانہ بشانہ ہیں۔
اس موقع پر سندھ اسمبلی میں قائد حزب اختلاف حلیم عادل شیخ نے کہا کہ سردار عبدالقیوم نیازی منجھے ہوئے سیاستدان ہیں جن کا خاندان ایک عرصے سے اپنے لوگوں کی خدمت میں مصروف ہے۔ عمران خان نے سردار عبدالقیوم نیازی کی صورت میں کارکن دوست وزیراعظم کا انتخاب کیا جس سے تحریک انصاف کے کارکنوں خوش ہیں ۔ انہوں نے کہا اپنے سیاسی تجربے کی بنیاد پر کہہ رہا ہوں کہ سردار عبدالقیوم نیازی آزادجموں و کشمیر کے کامیاب ترین وزیراعظم ثابت ہونگے۔انہوں نے کہا پورا پاکستان اپنے کشمیری بھائیوں کے ساتھ ہے۔
قبل ازیں وزیراعظم آزاد جموں کشمیر کے کراچی ائرپورٹ پہنچے پر اپوزیشن لیڈر سندھ اسمبلی حلیم عادل شیخ اور ڈپٹی اسپیکر آزادکشمیرقانون ساز اسمبلی ریاض گجر نے وزیراعظم کا پرتپاک استقبال کیا۔پی ٹی آئی رہنما امین اللہ موسی خیل بھی ان کے ہمراہ موجود تھے۔پی ٹی آئی کی جانب سے جاری بیان میں مزید کہا گیا ہے کہ اپنے دورے کے دوران وزیراعظم آزاد جموں کشمیر گورنر ہائوس میں کشمیر کے نمائندوں سے ملاقات کریں گے۔وزیراعظم گورنر ہاس میں کشمیری کمیونٹی کی تقریب میں بھی شرکت کریں گے۔مزار قائد پر حاضری دیں گے اور سندھ اسمبلی کا دورہ بھی کریں گے جہاں وہ اراکین اسمبلی سے ملاقات کریں گے۔
