کراچی۔7دسمبر (اے پی پی):چیئرمین نیب جسٹس جاوید اقبال کی ہدایت اور نیب کے نعرے ”ہمارا ایمان، کرپشن فری پاکستان”کی تعمیل میں نیب کراچی نے منگل کو یوم بین الاقوامی انسداد بدعنوانی کے حوالے سےآگاہی واک کا انعقاد کیا،انسداد بدعنوانی کا دن ہر سال اقوام متحدہ کے بدعنوانی کے خلاف کنونشن (UNCAC) کے تحت منایا جاتا ہے، کرپشن کے خلاف آگاہی واک کا آغاز چنکی منکی ریسٹورنٹ سے اے کے خان پارک سی ویو، کلفٹن کراچی تک ہوا۔ جاری کردہ اعلامیہ کے مطابق ڈی جی نیب کراچی ڈاکٹر نجف قلی مرزا (پی ایس پی ) نے واک کی قیادت کی۔ واک میں نیب کے افسران و اہلکاران اور تمام شعبہ ہائے زندگی سے تعلق رکھنے والے افراد کی بڑی تعداد نے شرکت کی جن میں ماہرین تعلیم، تعلیمی اداروں کے طلبا، مخیر حضرات، سندھ بوائز اسکاٹس اور سرکاری محکموں کے کارکنان شامل تھے۔ نیب 26 نومبر سے 12 دسمبر 2021 تک بین الاقوامی انسداد بدعنوانی کے حوالے سے دن منا رہا ہے اور اس پورے عرصے میں سکولوں، کالجوں، یونیورسٹیوں اور مقامی انتظامیہ میں تقریبات کا انعقاد کر رہا ہے۔ڈاکٹر نجف قلی مرزا ،ڈی جی نیب کراچی نے آگاہی واک کے شرکا سے خطاب کرتے ہوئے بدعنوانی کے برے اثرات سے متعلق عوامی آگاہی کی اہمیت پر روشنی ڈالی۔ انہوں نے کہا کہ نیب کراچی نے گزشتہ چند سالوں سے بدعنوانوں کے خلاف اپنی کارروائیوں کو تیز کیا ہے اور پوری کوشش کر رہا ہے۔ چیئرمین نیب جسٹس جاوید اقبال کے متحرک وژن اور رہنمائی کے تحت نیب کراچی بڑے پیمانے پر عوام کا اعتماد حاصل کرنے میں کامیاب رہا ہے۔انہوں نے معاشرے سے بدعنوانی کے خاتمے میں نوجوانوں کے کردار پر مزید روشنی ڈالی اور کہا کہ نوجوانوں کے کندھوں پر بھاری ذمہ داری عائد ہوتی ہے کہ وہ بدعنوانی کو جڑ سے اکھاڑ پھینکنے کی جدوجہد کا حصہ بنیں۔ اس سلسلے میں نیب نے بدعنوانی کی روک تھام اور عوام میں شعور اجاگر کرنے کے جذبے سے اسکولوں، کالجوں اور یونیورسٹیوں میں کریکٹر بلڈنگ سوسائٹیز تشکیل دی ہیں،اساتذہ نوجوانوں کی تربیت، تعلیم اور کردار سازی کے ذریعے معاشرے کو کرپشن، اقربا پروری اور جانبداری کی لعنت سے پاک کرنے کے لیے اپنا کردار فعال طور پر ادا کریں۔ انہوں نے میڈیا کے کردار کو سراہا خاص طور پر تحقیقاتی صحافت کے میدان میں جو بدعنوانی کے متعدد کیسز کو بے نقاب اور منظر عام پر لاتا ہے۔ انہوں نے زیرو ٹالرنس پالیسی اور “احتساب سب کے لیے” کے فعال نقطہ نظر کے ساتھ معاشرے سے بدعنوانی کے خاتمے کیلئے نیب کے عزم کا اعادہ کیا۔تمام سٹیک ہولڈرز، عوامی نمائندوں اور اتحادی شراکت داروں کے کردار پر روشنی ڈالتے ہوئے انہوں نے کہا کہ معاشرے کے تمام طبقات کو مل کر اس معاشرے کو بدعنوانی کی لعنت سے نجات دلانے کے لیے نیب کے مشن کو آگے بڑھانا ہوگا۔واک کے اختتام پر ڈی جی نیب کراچی ڈاکٹر نجف قلی مرزا نے واک میں شامل ہونے اور کرپشن کے خلاف آواز اٹھانے پر تمام شرکا کا شکریہ ادا کیا۔
