کوئٹہ، 03 جنوری (اے پی پی ): ڈپٹی اسپیکر قومی اسمبلی قاسم سوری نے کوئٹہ سے براہ راست دبئی کی فلائٹ سروس کی افتتاح کر دیا۔ افتتاحی تقریب سے خطاب کرتے ہوئے انہوں نے کہا کہ کوئٹہ سے دبئی براہ راست فلائٹ کی افتتاح سے بہت خوشی ہورہی ہے، کیونکہ بڑے عرصے سے یہاں سے براہ راست دبئی سروس لوگوں کا مطالبہ تھا، اور پی آئی اے نے یہ فریضہ سر انجام دے کر ایک بار پھر پاکستان کا نام فخر سے بلند کیا ہے۔
ڈپٹی اسپیکر قومی اسمبلی نے کہا کہ کورونا وباءنے ملک کے تمام شعبوں کو متاثر کیا،تاہم پی آئی اے نے کورونا وباءکے دوران بہت خوب کام کیا۔انہوں نے کہا کہ پی آئی اے نے سسٹم کو بہتر کردیا،جہاز اب وقت پر چلتے ہیں،اور پی آئی اے کی اچھی کارکردگی کی وجہ سے لوگ ہمارا شکریہ ادا کررہے ہیں۔انہوں نے کہا کہ کوئٹہ ائیرپورٹ پر نیا رن وے تعمیر ہورہا ہے،نئے رن وے سے بڑے جہاز بھی یہاں آئینگے اور پی آئی اے کی ترقی ہم سب کی ترقی ہے۔
