اسلام آباد،3جنوری (اے پی پی):جمادی الثانی1443ھ کا چاند نظر نہیں آیا اس لئے یکم جمادی الثانی کل بدھ 5 جنوری کو ہوگی۔ پیر کو یہاں وزارت مذہبی امور میں مرکزی رویت ہلال کمیٹی کا اجلاس چیئرمین مولانا سید محمد عبد الخبیر آزاد کی صدارت میں ہوا۔ اجلاس میں مرکزی رویت ہلال کمیٹی کے ارکان سمیت زونل کمیٹی اسلام آباد کے ارکان نے شرکت کی۔
مرکزی رویت ہلال کمیٹی کے چیئرمین مولانا سید محمد عبدالخبیر آزاد نے کہا کہ پاکستان بھر میں زونل کمیٹیوں کے اجلاس انکے ہیڈ کوارٹرز پرمنعقد ہوئے، پاکستان بھر میں مطلع ابر آ لود رہا اور کہیں سے بھی چاند نظر آنے کی کوئی اطلاع موصول نہیں ہوئی۔انہوں نے کہاکہ لہذا کمیٹی ارکان نے متفقہ اعلان کیا کہ آج چاند نظر نہیں آیا، یکم جمادی الثانی 1443 ہجری 5 جنوری بروز بدھ کو ہو گی۔
مولانا سید محمد عبد الخبیر آزاد نے کہا کہ شہریوں سے اپیل ہے وہ کورونا ایس او پیز پر عملدرآمد کریں۔
