لاہور،24 جنوری(اے پی پی):وزیراعلیٰ پنجاب سردار عثمان بزدارکی زیر صدارت آف گرڈ سلوشن منصوبوں پر پیشرفت کا جائزہ لینے کیلئے اعلی سطح اجلاس ہوا۔اجلاس میں دوردراز علاقوں میں بجلی کی فراہمی کیلئے ونڈ اینڈ سولر ہائی برڈ پلانٹ لگانے کا فیصلہ کیا گیا ۔
وزیر اعلیٰ پنجاب سردار عثمان بزدارنے اجلاس میں گفتگو کرتے ہوئے کہا کہ انرجی کے حصول کیلئے شمسی توانائی،ونڈ پاوراوربائیو گیس انرجی کے سستے ذرائع اپناناضروری ہے،آف گرڈ سلوشن کے ذریعے دوردراز دیہات تک بجلی پہنچائیں گے اورپنجاب کے دوردراز علاقوں کی مساجد میں سولر پینل سے بجلی فراہم کی جائے گی،7اضلاع کے528دیہات میں بجلی پہنچانے کیلئے سولر پاور پلانٹ لگائے جائیں گے،سولر پاور پلانٹس سے 30ہزار سے زائد گھروں کوسستی بجلی فراہم کی جائے گی۔
سردارعثمان بزدار نے کہا کہ پنجاب کے 5 واساز کے لئے سولر پاورپلانٹ لگایا جائے گا جس سے واسا کو بجلی کے بل کی مد میں اڑھائی ارب روپے سالانہ بچت ہوگی۔انہوں نے کہا کہ لاہورکی گوالا کالونی میں بائیو گیس پلانٹ لگایا جائے گا12اضلاع کے17لائیوسٹاک فارم پر بائیو گیس پلانٹس لگانے سے بجلی اورگیس حاصل کی جاسکے گی۔
پرنسپل سیکرٹری وزیراعلیٰ/سیکرٹری انرجی،قائداعظم سولر پاورپلانٹ کی سی ای او،منیجنگ ڈائریکٹرپی پی ڈی بی،چیف ایگزیکٹو آفیسر پی پی ڈی سی ایل اور متعلقہ حکام نے اجلاس میں شرکت کی
