اوکاڑہ،21مارچ(اے پی پی ): ورلڈ فاریسٹ ڈےکے موقع پر ڈپٹی کمشنر کیپٹن (ر) محمد علی اعجاز کی قیادت میں ڈسٹرکٹ کمپلیکس میں آگاہی واک کا انعقاد کیا گیا۔ ڈپٹی کمشنر آفس سے ڈی پی او آفس چوک تک واک کی گئی ۔ بعدا زاں ڈپٹی کمشنر نے قلعہ والا پارک میں جامن کا پودا بھی لگایا ۔
واک کے شرکاء سے خطا ب میں ڈپٹی کمشنر کیپٹن (ر) محمد علی اعجاز نے کہا ہے کہ درخت اس زمین کی خوبصورتی اور زندگی کو برقرار رکھنے کے لئے مسلمہ حیثیت رکھتے ہیں، درخت لگانے کی آج کی کاوشیں آنے والے دنوں میں ثمراور ہونگی ،ہمیں جنگلات کی کمی کا سامنا ہے اور درختوں کی کمی کی وجہ سے موسموں کی شدت میں اضافہ ہو رہا ہے اور دنیا میں ایکو سسٹم میں تبدیلی ہم سب کے لئے خطرے کی گھنٹی ہے، ہمیں آنے والے دنوں میں آلودگی اور موسمیاتی تبدیلیوں کا سامنا کرنے کے لئے بھر پور شجر کاری کرنا ہو گی۔
ڈویژنل فاریسٹ آفیسر مشتاق چغتائی نے بتا یا کہ ضلع میں رواں سیزن کے دوران 11 لاکھ 20 ہزارپودے لگانے کا ہدف مقرر کیا گیا جبکہ پودے لگانے کا ٹارگٹ 30 فیصد سے زائد مکمل کر لیا گیا ہے انہوں نے کہا کہ سرکاری دفاتر کے ساتھ ساتھ عام شہریوں کو سرکاری پالیسی کے مطابق پودے فراہم کئے جا رہے ہیں ۔
واک میں ایڈیشنل ڈپٹی کمشنر ریونیو مدثر فار قلیط، پاکستان تحریک انصاف کی رہنما میڈم شازیہ احمد،افسران،صحافیوں ،طلباء، سول سو ساٹی سمیت ہر شعبہ زندگی کے نمایاں افراد نے شرکت کی ڈویژنل فاریسٹ آفیسر مشتاق چغتائی اور ایس ڈی او فاریسٹ حافظ افتخار حسین اور فاریسٹ کے عملہ نے آگاہی پمفلٹس تقسیم کئے محکمہ جنگلات کی جانب سے آگاہی بینرز اور سٹیمرز بھی آویزاں کئے۔ بعد ازاں ڈپٹی کمشنر کیپٹن (ر) محمد علی اعجاز نے طلبا میں پودے بھی تقسیم کئے۔
سورس؛وی این ایس، اوکاڑہ
