اسلام آباد۔19جون (اے پی پی):اسپیکر قومی اسمبلی راجہ پرویز اشرف نے کہا ہے کہ عوام کی ترقی اور خوشحالی موجودہ حکومت کی اولین ترجیحات میں شامل ہے،اخوت فاؤنڈیشن کی جانب سے بلا سود قرضوں کی فراہمی ایک خوش آئند قدم ہے،بلا سود قرضوں سے عوام کو اپنا کاروبار شروع کرنے کا موقع ملے گا۔سپیکر سیکرٹریٹ کی جانب سے جاری پریس ریلیز کے مطابق اتوار کوگوجر خان میں اخوت فاؤنڈیشن کی جانب سے بلا سود قرضے کی فراہمی کے لیے منعقدہ تقریب سے خطاب کرتے ہوئے کہا کہ اخوت فاؤنڈیشن کے سربراہ ڈاکٹر امجد ثاقب کی گراں قدر خدمات کو خراج تحسین پیش کرتا ہوں،ڈاکٹر امجد ثاقب کے عوامی خدمت کے غیر متزلزل جذبے کو سنہری حروف میں لکھا جائے گا، راجہ پرویز اشرف نے کہا کہ اخوت فاؤنڈیشن کے عوامی خدمت کے کارنامے کو پوری دنیا میں سراہا جا رہا ہے، انسانیت کی فلاح و بہبود کے لیے کام کرنے والے افراد ہی ملک اور قوم کے حقیقی ہیرو ہیں،متوسط اور پسے ہوئے طبقات کی زندگیوں میں تبدیلی لانا ایک عظیم کارنامہ ہے،مستقل مزاجی اور مسمم ارادے سے عوام کی فلاح وبہبود کے لیے کام کرنے والے افراد پر قوم کو فخر ہے۔راجہ پرویز اشرف نے کہا کہ مجھے ایک بار پھر اللہ تعالیٰ نے گوجر خان کی عوام کی خدمت کا موقع فراہم کیا ہے،گوجر خان کی عوام کی ترقی اور خوشحالی کے لیے کوئی دقیقہ فروگزاشت نہیں رکھا جائے گا،گوجر خان میں اس وقت ترقیاتی منصوبوں کا اجراء ہو چکا ہے۔اسپیکر قومی اسمبلی نے کہا کہ عوام کی ترقی اور خوشحالی موجودہ حکومت کی اولین ترجیحات میں شامل ہے،اخوت فاؤنڈیشن کی جانب سے بلا سود قرضوں کی فراہمی ایک خوش آئند قدم ہے،بلا سود قرضوں سے عوام کو اپنا کاروبار شروع کرنے کا موقع ملے گا۔
