لاہور، 20جون(اے پی پی): گورنر پنجاب محمد بلیغ الرحمان سے رائس ایکسپورٹرز ایسوسی ایشن (REAP) کے وفد نے ملاقات کی۔
ملاقات میں چیئرمین REAP علی حسام اصغر، شہزاد علی ملک اور پیر سید ناظم حسین شاہ کے علاوہ پنجاب بھر سے آئے ہوئے ممبران منیجنگ کمیٹی و سابق چیئرمین REAP سمیع اللہ چوہدری سمیت دیگر عہدیداران شامل تھے۔
گورنر پنجاب نے اس موقع پر گفتگو کرتے ہوئے کہا کہ زراعت کو ملک کی معیشت میں بنیادی حیثیت حاصل ہے،اللہ کے فضل، کرم سے پاکستان کی زمین زرخیز ہے،چاول ان اجناس میں سے ہے جسے برآمد کر کے ہر سال کثیر زرمبادلہ کمایا جاتا ہے۔
گورنر پنجاب نے کہا کہ زراعت کے شعبے کو جدید طرز پہ استوار کر کے ملک کی معیشت مضبوط بنایا جا سکتا ہے اور کہا کہ حکومت کاشتکاروں کی فلاح بہبود کے لیے اقدامات اٹھا رہی ہے،مشکل حالات کے باوجود بجٹ میں زراعت کے شعبے کی ترقی کے لیے خاطر خواہ فنڈز رکھے گئے ہیں۔
وفد نے گورنر پنجاب کو بریفننگ دیتے ہوئے کہا کہ رائس ایکسپورٹر ایسوسی ایشن چاول کو برآمد کر کے حکومت کو سالانہ 2.5 بلین ڈالر کا زرمبادلہ دیتی ہے. انھوں نے مطالبہ کیا کہ رائس ایکسپورٹرز ایسوسی ایشن کو انڈسٹری کا درجہ دیا جائے.۔
