سکھر، 11جولائی (اے پی پی ): وفاقی وزیر آبی وسائل اور پیپلزپارٹی کے مرکزی رہنما سید خورشید شاہ نے پیٹرولیم مصنوعات کی قیمتوں کو کم کرانے کےلیے پارلیمنٹ میں آواز اٹھانے کا اعلان کیا ہے اور عوام سے وعدہ کیا ہے کہ ملک می چینی کی طرح پیٹرول کہ قیمتیں بھی جلد کم ہونگی، وزیراعظم شہباز شریف سیاسی آدمی ہیں وہ پیٹرول کی قیتمیں ضرور کم کریں گے۔ پیر کے روز سکھر پریس کلب میں پریس کانفرنس سے خطاب کرتے ہوئے ان کا کہنا تھا کہ یہ ملک قائم رہنے کے لیے بنا ہے، ملک ٹوٹنے کی باتیں پہلے بھی کی جاتی رہی ہیں مگر ملک قائم ہے اور قائم رہے گا۔ ان کا کہنا تھا کہ ہم پر تنقید کرنے والے اتنی جلدی نہ کریں صرف دو فصلیں تو اترنے دیں۔ ہماری پالیسیز كو صرف دس سال تک چلتے رہنے دیں ، اگر ملک میں خوشحالی نہ آئے تو مجھے لٹکا دینا۔دعوے سے کہتا ہوں کہ اگر زراعت کو محور بنالیاجائےتو دس سال بعد ہمیں آئی ایم ایف کے پاس جانے کی ضرورت نہیں پڑے گی۔ ان کا کہنا تھاکہ ہمارے پاس پانی ہے مگر ڈیمز نہیں، پاکستان کو اگر کسی نے بچایاہے تو یہ پانی ڈیمز اور زراعت ہوگی۔ حکومت زراعت کی ترقی پرتوجہ دے رہی ہے۔ وہ ملک میں پندرہ لاکھ ٹیوب ویلز کو سولر انرجی پر لانے کے لیے لون دے رہی ہے۔ سولر انرجی پر خصوصی توجہ دی جارہی ہے اگر ملک میں ایک کروڑ گھر سولر پر چلے گئے تو ملک سے لوڈ شیڈنگ کا خاتمہ ہوجائے گا ان کا کہنا تھا کہ انشاء اللہ 2023 میں ہم ویٹ کاٹن ایکسپورٹ کریں گے۔ ان کا کہنا ہے کہ ملک میں مہنگائی کرنے والے ہم پر تنقید کر رہے ہیں ان کا کہنا تھا کہ پاکستان میں بھی سگریٹ کے نرخ بھارت کے برابر ہونے چاہییں۔ سوفٹ ڈرنکس پر اتنا ٹیکس لگایا جانا چاہیئے کہ وہ خریدی نہ جاسکے ۔ان کا کہناتھا کہ ہم جلسے جلوس نہیں کررہے ہم معیشت کی جنگ لڑ ریے ییں ۔ عمران خان کو تو ساڑھے تین سال تک سپورٹ رہی مگر افسوس ہے وہ کچھ نہ کرسکا ہم ایک سال میں معیشت کو اوپر لے جانا چاہتے ہیں۔ ان کا کہنا تھا کہ پہلے عیدیں خوشیاں لاتی تھی مگر اب 60 فیصد لوگ عید کی خوشیاں نہیں منا سکے ہیں ۔اللہ کرے عمران خان کو اتنی سمجھ آجائے کہ وہ ملک اور کرکٹ گراؤنڈ میں فرق سمجھ سکے۔
