اوکاڑہ،13جولائی (اے پی پی): ایڈیشنل ڈپٹی کمشنر جنرل ملک عباس ذوالقرنین نے کہا ہے کہ انسداد ڈینگی کے لئے محکمانہ کاوشوں کے ساتھ ساتھ ہر ادارے اور ہر فرد کا اس میں شامل ہونا ازحد ضروری ہے، تمام سرکاری محکمے ویکٹر سر ویلنس اور صفائی ستھرائی کے سلسلہ میں اپنی ذمہ داریوں کو پورا کریں ۔
ان خیالات کا اظہار انہوں نے انسداد ڈینگی کمیٹی کے اجلاس کی صدارت کرتے ہوئے کیا اس موقع پر سی ای او ہیلتھ مہار اختر حسین اور ڈسٹر کٹ انٹا مالوجسٹ محمد اقبال نے ضلع میں ویکٹر سر ویلنس ،ہاٹ سپاٹس کی نگرانی ،ہسپتالوں میں ڈینگی کے تشخیص اور ڈینگی وارڈز میں مختص بیڈز کی تعداد ،لاجسٹک سہولیات اور ضلع کی تینوں تحصیلوں میں کام کرنے والی ٹیموں کی کارکردگی سے متعلق بریفنگ دیتے ہوئے بتایا کہ اوکاڑہ میں ہاٹ سپاٹس ہیں جن کی مسلسل نگرانی کی جا رہی ہے، ضلع میں تمام آوَٹ ڈوراور ان ڈور ٹیمیں ویکٹر سر ویلینس کے کام میں مصروف عمل ہیں۔
ایڈیشنل ڈپٹی کمشنر جنرل ملک عباس ذوالقرنین نے کہا کہ حالیہ موسم میں مچھروں کی افزائش ڈینگی کے خطرات کو بڑھا رہی ہے، انتہائی احتیاط اور ماہرین کی ہدایات پر عملد رآمد سے ہی ڈینگی کے پھیلاوَ کو روکا جا سکتا ہے۔انہوں نے کہا کہ انسداد ڈینگی کا کام انتہائی احتیاط اور محنت طلب ذمہ داری ہے جس کے لئے کسی سطح پر غفلت اور لاپرواہی کی گنجائش نہیں ہے۔
ایڈیشنل ڈپٹی کمشنر جنرل ملک عباس ذوالقرنین نے کہا کہ ڈینگی کے پھیلاؤ کو روکنے میں جہاں سرکاری محکمے اپنا کردار ادا کر رہے ہیں وہیں پر عوام الناس سے اپیل ہے کہ وہ اپنے گھروں ،گلی محلوں کو صاف ستھرا رکھنے میں اداروں کی معاونت کریں اور ایک ذمہ دار شہری کا کردار ادا کریں ۔
