لاہور ، 14 جولائی(اے پی پی): گورنر پنجاب محمد بلیغ الرحمان نے کہا ہے کہ اگست سے پنجاب کے تمام سکولوں میں قرآن کی تعلیم پہلی دفعہ مکمل طریقے سے شروع کر دی جائے گی۔ مسلم لیگ (ن) کے سابقہ دور حکومت میں تعلیمی اداروں میں بطور وفاقی وزیر تعلیم قرآن کریم کی تعلیم کے لیے اقدامات کیے ۔
ان خیالات کا اظہار انہوں نے جمعرات کو یہاں صدر مسلم لیگ ن علماء مشائخ ونگ مفتی انتخاب احمد نوری کی قیادت میںدفد سے ملاقات میں کیا۔ملاقات میں گفتگو کرتے ہوئے گورنر پنجاب کا کہنا تھا کہ پاکستان مسلم لیگ ن کے علماء مشائخ ونگ میں تمام مکاتب فکر کے علماء کی نمائندگی اچھا پیغام دیتی ہے، اس حوالے سے قانون 2018 میں مسلم لیگ ن کی حکومت میں پنجاب اور وفاق میں پاس کیا گیا تھا۔انہوں نے کہا کہ معاشرے میں علماء کا کردار درخشاں ستارے کی مانند ہے، علماء دین سے متعلق معاملات میں رہنمائی فراہم کرتے ہیں، ان کی عزت، تکریم مقدم ہونی چاہئیے۔
بلیغ الرحمان نے کہا کہ اسلام مکمل ضابطہ حیات ہے۔ معاشرے میں امن، برداشت اور رواداری قائم کرنے میں علماء کرام کا اہم کردار ہے۔ انہوں نے کہا کہ بچوں اور نوجوانوں کو دین کی تعلیمات سے روشناس کرانے کی ضرورت ہے۔انہوں نے علماء کرام سے ملک کو معاشی بحران سے نجات کے لیے دعا کرنے کی اپیل کی ۔
وفد میں جنرل سیکرٹری پنجاب صاحبزادہ حافظ محمد امجد، پیر سید عمران شاہ اور دیگر علمائے کرام شامل تھے۔
