ملتان، 29 جولائی(اے پی پی):موٹروے پر کسی بھی ایمرجنسی/حادثہ کی صورتحال پر قابو پانے کے لیے بیٹ 23 میں موک ایکسرسائز ہوئی جس میں سیکٹر آفس اور بیٹ 23 کے تمام آفیسران نےشرکت کی۔
تفصیلات کے مطابق انسپکٹر جنرل نیشنل ہائی ویز اینڈ موٹرویز پولیس خالد محمود اور زونل کمانڈر ندیم اشرف وڑائچ کے احکامات کی روشنی میں سیکٹر کمانڈر رانا محمد اسماعیل کی زیر نگرانی بیٹ 23 میں موک ایکسرسائز کی گئی جس میں سیکٹر آفس اور بیٹ 23 کے ڈی ایس پی مسرور علی سمیت تمام آفیسران نے شرکت کی۔ موک ایکسرسائز میں ایکسڈنٹ ہینڈلنگ، جائے حادثہ کو محفوظ کرنا، ٹریفک کی روانی کو بغیر رکاوٹ یقینی بنانا، الائیڈ اور ریکوری سروسز کا استعمال،زخمیوں کو فرسٹ ایڈ دینا اور باحفاظت ہسپتال منتقل کرنا شامل تھے۔
سیکٹر کمانڈر رانا محمد اسماعیل نے بتایا کہ موک ایکسرسائز کا مقصد آفیسران کی پیشہ ورانہ صلاحیتوں کو مزید اجاگر کرنا ہے تا کہ آفیسران نا صرف اپنے فرائض منصبی احسن طریقے سے سرانجام دیں بلکہ خدانخواستہ کسی ناخوشگوار واقعہ رونما ہونے کی صورت میں ہر قسم کی صورتحال پر با آسانی قابو پا سکیں۔
