اسلام آباد،29جولائی (اے پی پی):وزیر مملکت برائے پٹرولیم ڈاکٹر مصدق ملک نے کہا ہے کہبرطانوی جریدے نے عمران خان کی منی لانڈرنگ کا انکشاف کیا،عارف نقوی کی ابرآج کیپٹل پاکستانی نہیں غیر ملکی کمپنی ہے۔
جمعہ کو یہاں پریس کانفرنس سے خطاب کرتے ہوئے ڈاکٹر مصدق ملک نے کہا کہ کالا دھن پی ٹی آئی کو فنڈنگ کیلئے فراہم کیا گیا ہے، آئین کے تحت ملک میں سیاست کرنی ہے تو پھر کسی غیر ملکی کمپنی سے آپ فنڈز نہیں لے سکتے، اگر فنڈز لئے جائیں گے تو وہ کالا دھن اور غیر قانونی رقم ہو گی، کسی غیر ملکی ریاست یا کسی دوسرے ملک کی کابینہ کے رکن سے بھی پیسے نہیں لئے جا سکتے کیونکہ ایسا ثابت ہونے پر پارٹی پر پابندی لگ سکتی ہے۔ انہوں نے کہا کہ برطانوی جریدے نے انکشاف کیا ہے کہ کالا دھن پی ٹی آئی کو فنڈنگ کے نام پر فراہم کیا گیا، عارف نقوی کی کمپنی ابراج انویسٹمنٹ اور ابراج کیپٹل میں پاکستانیوں کا پیسہ نہیں ہے بلکہ اس میں غیر ملکی سرمایہ کاروں کا پیسہ ہے، عارف نقوی عمران خان کے فنڈ منیجر ہیں، وہ کالے دھن اور جعلسازی میں برطانیہ اور امریکہ میں پکڑے گئے ہیں اور امریکہ اسے حوالے کرنے کا مطالبہ کر رہا ہے۔
ڈاکٹر مصدق ملک نے کہا کہ عارف نقوی کے پاکستان میں کچھ مفادات تھے اس لئے پی ٹی آئی کو فنڈز دینا چاہتا تھا اور اسی مقصد کیلئے آکسفورڈ شائر میں کئی ایکڑ پر ایک گرائونڈ اور ووٹن کرکٹ کلب بنایا گیا اور ٹی ٹونٹی کرایا گیا، کرکٹ میچ میں عمران خان کو مہمان خصوصی کے طور پر بلایا گیا تھا، جریدے میں اس کی پوری داستان شائع ہوئی ہے، ابراج کیپٹل پاکستانی نہیں غیر ملکی کمپنی ہے، پی ٹی آئی نے غیر ملکی کمپنی اور غیر ملکی کابینہ کے ایک رکن سے کئی ملین پائونڈ لئے لیکن وہ صادق اور امین کیسے ہو سکتے ہیں جبکہ سابق وزیراعظم نواز شریف کو اپنے بیٹے سے تنخواہ نہ لینے پر نااہل قرار دے دیا گیا۔
