لاہور،7اگست ( اے پی پی ): وزیر اعلیٰ پنجاب چوہدری پرویز الہیٰ نے کہا ہے کہ یوم عاشور پر مذہبی رواداری کے فروغ کے علماء کرام کے کردار کے معترف ہیں، پنجاب حکومت تمام مکاتب فکر کے علماء کرام کے مثالی تعاون کو تحسین کی نظر سے دیکھتی ہے، علماء کرام کے تعاون اور حکومتی اقدامات کے باعث امن و امان کی صورتحال بہتر ہوئی ہے۔
ان خیالات کا اظہار وزیر اعلیٰ پنجاب چوہدری پرویز الہیٰ نے سیکرٹری جنرل وفاق المدارس العربیہ پاکستان مولانا محمد حنیف جالندھری سے ملاقات کے دوران گفتگو کرتے ہوئے کیا ۔انہوں نے کہا کہ نکاح رجسٹرار کو ختم نبوت ﷺ کے حلف نامے والے نئے فارم فراہم کرنے کے لئے متعلقہ محکمے کو ہدایات جاری کردی ہیں، نئے فارم نہ دینے والوں کے خلاف سخت کارروائی کی جائے گی۔انہوں نے کہا کہ نیا نکاح فارم استعمال نہ کرنے والے نکاح رجسٹرار کو 1 ماہ قید اور جرمانے کی سزا ہو سکتی ہے۔
مولانا محمد حنیف جالندھری نے نکاح نامے میں ختم نبوتؐ کے حلف نامے کی شق شامل کرنے پر وزیر اعلیٰ چودھری پرویزالہٰی کے مثالی اقدام کو سراہا اور کہا کہ آپ کا یہ احسن اقدام دین کی بڑی خدمت ہے ۔انہوں نے کہا کہ صوبے میں مذہبی رواداری اور ہم آہنگی کے فروغ کیلئے آپ کی سربراہی میں پنجاب حکومت نے بہترین اقدامات کئے ہیں۔
حافظ عمار یاسر اور رمیش خان بھی اس موقع پر موجود تھے۔
