لاہور، اگست 23(اے پی پی): گورنر پنجاب محمد بلیغ الرحمان سے متحدہ عرب امارات کے سفیر حماد عبید ابراہیم سلیم الزیبی نے گورنر ہاؤس پنجاب میں ملاقات کی اور باہمی دلچسپی کے امور اور دو طرفہ تجارت کو بڑھانے پہ تبادلہ خیال کیا گیا۔ یو اے ای کے سفیر نے پاکستان کے ساتھ صحت، تعلیم، زراعت، بائیو ٹیکنالوجی، فوڈ سیکیورٹی سمیت مختلف شعبوں پر بھی تعاون کو مذید بڑھانے پر زور دیا گیا۔ ملاقات میں دو طرفہ اقتصادی تعاون کو وسعت دینے اور سرمایہ کاری کے نئے مواقع پیدا کرنے پر بھی زور دیا گیا۔ گورنر پنجاب محمد بلیغ الرحمن نے گفتگو کرتے ہوئے کہا کہ دونوں ممالک میں دیرینہ تاریخی برادرانہ تعلقات ہیں۔ یو اے ای سے تعلقات حکومتی اور عوامی سطح پر باہمی محبت اور احترام کی بنیاد پر مضبوط بنیادوں پر استوار ہیں۔ بلیغ الرحمن نے کہا کہ پاکستان صحت اور تعلیم سمیت دیگر شعبوں میں یو اے ای کے تعاون کو قدر کی نگاہ سے دیکھتا ہے۔ وزیراعظم پاکستان شہباز شریف کے وژن کے مطابق پاکستان اور یو اے ای کے مابین باہمی تجارت کو مذید فروغ دیا جائے گا۔ گورنر پنجاب نے متحدہ عرب امارات کی مسئلہ کشمیر پہ پاکستانی موقف کی حمایت کرنے پر یو اے ای کے سفیر کا شکریہ ادا کیا۔ گورنر پنجاب نے کہا کہ دونوں ممالک کے درمیان تجارتی وفود کے زیادہ سے زیادہ تبادلے ہونے چاہئیں۔ یو اے سی کے سفیر نے کہا کہ پاکستان کی افرادی قوت سالہا سال سے یو اے ای کی معیشت اور تعمیر و ترقی میں اہم کردار ادا کر رہی ہے۔ پاک یو اے ای تعلقات خطے کے لیے ایک مثال ہیں۔ یو اے ای سفیر نے کہا کہ پاکستان کے ساتھ تجارت کو مذید فروغ دینے کی ضرورت ہے۔ پاکستانی سرمایہ کاروں کے ساتھ متحدہ عرب امارات میں مختلف شعبوں میں سرمایہ کاری کے لیے مشترکہ منصوبوں پر کام شروع کرنے کے خواہاں ہیں۔
