جوھرآباد،09 ستمبر(اے پی پی ): پنجاب ایمرجنسی سروس ڈیپارٹمنٹ خوشاب کے زیراہتمام ابتدائی طبی امداد کے عالمی ہفتہ کے حوالے سے ڈسٹرکٹ آفیسر ریسکیو انجینئر حافظ عبدالرشید کی زیر قیادت ٹریفک پولیس کے باہمی تعاون سے ریلی کا انعقاد کیا گیا ۔ اسٹیشن کوآرڈینیٹر تصدق حسین اور کمیونٹی انسٹرکٹرز نے سکول و کالج کے طلباء و طالبات،ریسکیو رضاکاروں،ہسپتالوں اور نجی اداروں کے اہلکاروں کو کسی بھی ناگہانی صورتحال سے نمٹنے کے لئے فرسٹ ایڈ کی ٹریننگ فراہم کی جس میں چوٹ لگنے کی صورت میں خون کے بہاؤ کو روکنے،سانس کی نالی میں رکاوٹ،سانس اور دل بند ہونے کی صورت میں مصنوعی طریقے سے دل اور سانس کی بحالی کا عمل اور دوران ایمرجنسی بحفاظت مریض کی منتقلی کی عملی تربیت فراہم کی گئی ۔
انہوں نے کہا کہ انٹرنیشنل فرسٹ ایڈ ویک منانے کا مقصد ہر گھر میں ایک فرسٹ ایڈر کے متعلق لوگوں میں شعور و آگاہی پیدا کرنا تھا۔ انہوں نے کہا کہ تمام منظم اداروں کے اہلکاروں کی ٹیمز پنجاب ایمرجنسی سروس ڈیپارٹمنٹ سے ابتدائی طبی امداد کی ٹریننگ حاصل کریں تاکہ کسی بھی حادثے کی صورت میں وہ زیادہ سے زیادہ متاثرہ لوگوں کو ابتدائی طبی امدادمہیا کر کے قیمتی جانوں کے ضیاع میں کمی لانے میں اہم کردار ادا کرسکیں ۔
آخر میں لوگوں میں آگاہی کے لئے پمفلٹس بھی تقسیم کئے گئے۔
