پشاور، 13ستمبر(اے پی پی): محکمہ جنگلات خیبرپختونخوا کے ملازمین نے سیلاب زدگان کیلئے رضاکارانہ طور پر فنڈز عطیہ کر دئیے ہیں، اس سلسلے میں آج یہاں وزیراعلی ہاؤس میں جنگلات ملازمین کیجانب سے پچاس لاکھ 86 ہزار روپے کا چیک وزیراعلی محمود خان کے حوالے کیا گیا، یہ رقم چیف منسٹر فلڈ ریلیف فنڈ میں جمع کرائی جائے گی۔
وزیراعلی محمود خان کو اس موقع پر بریفنگ کے دوران بتایا گیا کہ بی پی ایس 17 اور اوپر کے ملازمین نے اپنی تین دن کی تنخواہ فلڈ ریلیف فنڈ میں جمع کرائی، جبکہ بی پی ایس 16 کے ملازمین نے دو دن کی تنخواہ فلڈ ریلیف فنڈ میں جمع کرائی جبکہ بی پی ایس 15 اور نیچے کے ملازمین نے ایک دن کی تنخواہ ریلیف فنڈز کے لیے دی ہے۔
وزیراعلی محمود خان نے محکمہ جنگلات کے ملازمین کے تعاون کو قابل ستائش قرار دیتے ہوئے کہا کہ اس قسم کے اقدامات سے سیلاب زدگان کی حوصلہ افزائی ہوگی۔
