کوئٹہ، 16 اگست ( اے پی پی ): وزیراعلیٰ بلوچستان میر عبدالقدوس بزنجو نے کہا ہے کہ آواران ہسپتال پاک فوج اور حکومت کے مشترکہ تعاون کی روشن مثال ہے، ہسپتال کے انتظامی امور اور علاج ومعالجہ کی سہولتوں میں پاک فوج کا کردار قابل تحسین ہے، پاک فوج کے ڈاکٹر اور طبی عملہ صوبے کے اس دور دراز ضلع میں عوام کی خدمت کر رہے ہیں۔
ان خیالات کااظہارانہوں نے جمعہ کو ڈسٹرکٹ ہیڈ کوارٹر اسپتال آواران کے دورے کے موقع پر بات چیت کرتے ہوئے کیا، اس موقع پرصوبائی وزیر عبدالرشید بلوچ چیف سیکریٹری عبدالعزیز عقیلی آئی جی پولیس عبدالخالق شیخ سیکریٹری صحت حافظ طاہر بھی ہمراہ تھے۔
وزیراعلیٰ نے ہسپتال کے مختلف شعبوں کا بھی معائنہ کیا اور مریضوں سے حال احوال بھی کیا۔ وزیراعلیٰ کو پاک فوج اور سول انتظامیہ کے تحت چلنے والے جوائنٹ ہسپتال کے امور پر بریفنگ بھی دی گئی۔
وزیراعلیٰ بلوچستان میر عبدالقدوس بزنجو نے کہا کہ آواران کے عوام امن کے قیام اور طبی سہولتوں کی فراہمی کیلئے پاک فوج کے تعاون کو قدر کی نگاہ سے دیکھتے ہیں ،ہسپتال میں علاج کی جدید سہولتوں اور ادویات کی دستیابی یقینی بنائیں گے ۔انہوں نے کیسکو حکام کو ہسپتال کوبجلی کی مسلسل فراہمی کیلئے فوری اقدامات کی ہدایت بھی کی۔
