ملتان۔1مارچ (اے پی پی):ایڈیشنل چیف سیکرٹری جنوبی پنجاب کیپٹن(ر )ثاقب ظفر کی زیر صدارت ترقیاتی منصوبوں پر کام کی رفتار کا جائزہ لینے کے لئے اجلاس منعقد ہوا جس میں تمام محکموں کے ایڈمنسٹریٹیو سیکرٹریز نے شرکت کی۔اجلاس میں ایڈیشنل چیف سیکرٹری جنوبی پنجاب نے کہا کہ جنوبی پنجاب میں 2468 منصوبوں پر کام جاری ہے جس کے لئے بجٹ میں 254 ارب روپے مختص کئے گئے ہیں۔انہوں نے بتایا کہ جنوبی پنجاب میں 11 میگا پراجیکٹس پر کام جاری ہے جبکہ خطے میں 9 نئے میگا پراجیکٹس پر کام شروع کردیا گیا ہے۔انہوں نے کہا کہ جنوبی پنجاب کے محکموں کورواں مالی سال میں اب تک 126 ارب روپے جاری کئے گئے ہیں جن میں سے منصوبوں پر101ارب روپے خرچ کردئے گئے ہیں۔ انہوں نے کہا کہ نشتر ٹو کی تعمیر پر جاری کردہ تمام 3 ارب40 کروڑ روپے خرچ کردیئے گئے ہیں جبکہ ڈیرہ غازی خان انسٹی ٹیوٹ آف کارڈیالوجی کے لئے جاری کردہ سو فیصد فنڈز خرچ ہوگئے ہیں۔اسی طرح شیخ زیدمیڈیکل کالج رحیم یار خان کے منصوبے پر جاری کردہ 60 کروڑروپے اور اوچ شریف سے احمد پور شرقیہ جانیوالی شاہراہ پر1ارب 50کروڑ روپے خرچ کئے گئے ہیں۔اس موقع پر اجلاس کو بریفنگ دیتے ہوئے بتایا گیا کہ 8 نئے ترقیاتی منصوبوں کی منظوری دے دی گئی ہے۔بریفنگ میں بتایا گیا کہ جنوبی پنجاب میں واٹرسپلائی کی سکیموں اور چولستان ڈویلپمنٹ اتھارٹی کے منصوبوں کے لئے جاری کردہ سو فیصد فنڈز خرچ کر دیئے گئے ہیں۔ بریفنگ میں مزید بتایا گیا کہ لوکل گورنمنٹ کے منصوبوں پر فنڈز کے خرچ کی شرح 95 فیصد ،اربن ڈویلپمنٹ 86 فیصد، روڈ91 فیصد، اریگیشن 90 فیصد اور ہائر ایجوکیشن کے منصوبوں پر فنڈز خرچ کرنے کی شرح84 فیصد ہے۔
