اسلام آباد،25مئی (اے پی پی):چیئرمین سینیٹ محمدصادق سنجرانی نے کہا ہے کہ پاکستانی قوم شہدا ءکی قربانیوں کو نہ کبھی بھولی ہےاور نہ بھولے گی، ہر محب وطن پاکستانی اپنی مٹی کی محبت میں شہید ہونے والوں سے والہانہ محبت کو اپنا فرض سمجھتا ہے۔
چیئرمین سینیٹ نے یومِ تکریم شہداِ ءپاکستان کے موقع پر اپنے پیغام میں کہا کہ ہر محب وطن پاکستانی اپنی مٹی کی محبت میں شہید ہونے والوں سے والہانہ محبت کو اپنا فرض سمجھتا ہے، ہمارا ایمان ہے کہ پاکستانی قوم شہدا کی قربانیوں کو نہ کبھی بھولی ہےاور نہ کبھی بھولے گی۔
انہوں نے کہا کہ حالات چاہے جیسے بھی ہوں وطن کے محافظوں سے محبت پاکستان سے محبت کرنے کے مترادف ہے، جو قومیں اپنے شہدا کو بھول جاتی ہیں اُن کا تاریخ میں کوئی نام لیوا نہیں ہوتا،شہدا ءکے خون کا ہم سب پر قرض ہے۔
ان کا کہنا تھا کہ آج کے دن ہم سب کو مل کر اس عہد کی تجدید کرنا ہو گی کہ پاکستان کی ترقی اور خوشحالی کی خاطر نفرتوں کی تمام دیواروں کو ختم کر دیں گے اور وطنِ عزیز کے تمام شہدا کی قربانیوں کو نا صرف یاد رکھا جائیگا بلکہ ان کے تقدس اور حرمت پر کبھی کوئی آنچ نہیں آنے دیں گے۔
