اسلام آباد،25مئی (اے پی پی):سپیکر قومی اسمبلی راجہ پرویز اشرف نے جمعرات کو یوم تکریم شہدا ءکے سلسلے میں شہدا کی یادگار پر حاضری دی ۔ انہوں نے گوجر خان میں کیپٹن راجہ محمد سرور شہید(نشان حیدر) کے مزار پر حاضری دی ، پھولوں کی چادر چڑھائی اور فاتحہ خوانی کی۔ بعد ازاں سپیکر نے سوار محمد حسین شہید(نشان حیدر) کو خراج عقیدت پیش کیا۔اس موقع پر میڈیا سے گفتگو کرتے ہوئے سپیکر نے کہا کہ شہید کی جو موت ہے وہ قوم کی حیات ہے۔انہوں نے کہا کہ 9 مئی کے افسوسناک واقعات کو تاریخ میں سیاہ باب کے طور پر یاد رکھا جائے گا، آج ہماری آزاد ماحول میں زندگی بسر کرنے کے پیچھے لاکھوں شہدا کی قربانیاں شامل ہیں،پوری قوم اپنے شہدا کو خراج عقیدت پیش کرتی ہے۔ سپیکر نے کہا کہ9 مئی کے واقعات کے پیچھے مذموم مقاصد تھے،ان واقعات میں ملوث کرداروں کو قانون کے کٹہرے میں لایا جائے گا،محب وطن پاکستانی اپنی مسلح افواج کے ساتھ سیسہ پلائی ہوئی دیوار کی مانند کھڑے ہیں۔ان کا کہنا تھا کہ قوم کے بہادر سپوتوں کی عظیم قربانیوں کو کبھی فراموش نہیں کیا جا سکتا،ہماری سر زمین شہیدوں اور غازیوں کی سر زمین ہے۔
