اٹک،17 جولائی (اے پی پی): کمشنرراولپنڈی لیاقت علی چٹھہ نےکہاہےکہ محرم الحرام ہمیں صبرو استقامت کادرس دیتاہے ۔
انہوں نےان خیالات کااظہار ڈی سی آفس اٹک میں محرم الحرام کے حوالے سے ضلعی امن کمیٹی کےاہم اجلاس کی صدارت کرتےہوئے کیا۔اجلاس سے خطاب کرتے ہوئے شر کاء نے کہا کہ محرم الحرام ہمیں اتحاد و یگانگت،صبر و استقامت کادرس دیتا ہے۔امام عالی مقام رضی اللہ عنہ اور ان کے ساتھیوں کی میدان کر بلا میں شہادت ہمیں باطل کے سامنے مضبوطی سے کھڑا ہو نے کا سبق سکھاتی ہے۔ضرورت اس امر کی ہے کہ ہم شہدائے کر بلا کی بے مثال قربانیوں کے لا زوال درس پر عمل کر یں اور اپنی زندگیوں کو اللہ تعالیٰ،حضرت محمد مصطفیﷺ،اہل بیت اطہار اور صحابہ اکرام رضوان اللہ اجمعینؓ کی سنت کے مطابق گذاریں تاکہ دیناو آخرت میں فلا ح پا سکیں۔
انہوں نے کہا کہ یہ مبارک مہینہ اہمیں ایثار و قربانی سے ہمکنار کر تاہے۔ہمیں چاہیے کے اللہ تعالیٰ کے پسندیدہ لوگوں کی زندگیوں کو مشعل راہ بنائیں تاکہ روز محشر اللہ تعالیٰ اورحضرت محمد مصطفیﷺ کے سامنے کامیابی حاصل کر سکیں۔
اجلا س میں محرم الحرام سے متعلق تمام امور زیر بحث لائے گئے۔تمام شر کاء نے بھرپور رائے کا اظہار کیا اور مختلف تجاویزپیش کیں۔اجلاس کےشرکاءکوبریفنگ دیتے ہوئے ڈی سی اٹک راٶعاطف رضانے کہا ماہ مبارک میں تمام مذہبی اجتماعات کو مکمل میونسپل سروسز فراہم کی جائیں گی۔عوام سے اپیل ہے کہ وہ ان اجتماعات میں حکومت پنجاب کی جانب سےجاری کردہ ضابطہءاخلاق پر بھرپور عمل درآمد کر یں۔ ضلعی و تحصیل سطع پر کنٹرول رومز بھی قائم کیے جائیں گے جہاں سے تمام اجتماعات کی مکمل اور سخت نگرانی کی جائے گی۔
ڈی پی او اٹک ڈاکٹر غیاث گل خان نے کہا کہ محر م الحرام میں فول پر وف سیکو رٹی کے انتظامات کیے جائیں گے۔مذہبی منافرت پھیلانے والوں کے ساتھ سختی سے نمٹا جائے گا اور اس ضمن زیرو ٹالرنس کی پالیسی اپنائی جائے گی۔ ضلع پولیس مذہبی اجتماعات کے منتظمیں کے ساتھ مکمل رابطے میں ہے۔سوشل میڈ یا کے مواد کو سختی سے مانیٹر کیا جائے گا اور کسی بھی قسم کے قابل اعتراض مواد کو کسی بھی قسم کے میڈ یا چینل پر نشر کر نے کی اجازت نہیں ہو گی اور ایسا کرنے والوں کےخلاف سخت ترین تادیبی کاروائی عمل میں لائی جائے گی۔
ممبران امن کمیٹی نے انتظامیہ کو مکمل تعاون کی یقین دہانی کر وائی۔آر پی او سیدخرم علی شاہ نے کہاکہ ہمیں محرم الحرام میں شرپسند عناصر سےمحتاط رہنےکی ضرورت ہے۔کمشنر راولپنڈی نے کہاکہ وہ اورآرپی او راولپنڈی محرم الحرام کےدوران بھی سیکورٹی ودیگرانتظامات کاجائزہ لینےکےلیےاٹک کادورہ کریں گےاور تمام سرگرمیوں کی باریک بینی سے نگرانی کی جائے گی تاکہ امن وسکون کویقینی بنایاجاسکے۔
آخر میں مولانامحمودالحسن توحیدی نے ملک کے امن و سلامتی کے لیے دعا کروائی۔اجلاس کےبعدکمشنرراولپنڈی لیاقت علی چٹھہ اورآرپی او راولپنڈی سیدخرم علی شاہ نے ضلعی انتظامیہ کےاعلیٰ افسران کےہمراہ جلوس کے راستوں کابھی معائنہ کیا۔
اجلاس میں ڈپٹی کمشنر اٹک راٶ عاطف رضا ،ایڈیشنل ڈپٹی کمشنرجنرل عدنان انجم راجہ،ایڈیشنل ڈپٹی کمشنر ریونیو وقاص اسلم مارتھ،ایڈیشنل ڈپٹی کمشنر فنانس اینڈپلاننگ وقار اکبر چیمہ،ممبران امن کمیٹی پیر سعادت علی شاہ، مو لانا شیر زمان،سید وقار نقوی،آفتاب حسین حیدری،مولاناعارف حسین واحدی، سیدقمرعباس نقوی اور دیگر ممبران و افسران بھی موجود تھے۔
