ملتان، 18 جولائی (اے پی پی ):ریجنل پولیس آفیسر کیپٹن (ر) محمد سہیل چودھری نے رات گئے ڈسٹرکٹ ملتان کے حساس مقامات حرم گیٹ، شاہ رسال، چوک بازار، حسین آ گاہی ودیگر علاقوں کا دورہ کیا۔ اس موقع پر ایس پی سٹی حسن رضا کھاکھی ، چیف سکیورٹی آ فیسر ریجنل پولیس آ فس ملتان انسپکٹر شبانہ سیف ودیگر افسران بھی ہمراہ تھے۔ جنہوں نے آ ر پی او کو جلوسوں کے راستے بارے تفصیل سے بریفنگ دی ۔
اس موقع پر آ ر پی او کا کہنا تھا کہ ملتان ریجن میں محرم الحرام کے دوران امن و امان کی فضاء قائم رکھنے میں ہم سب کو کلیدی کردار ادا کرنا ہوگا ، علماء کرام ان ایام میں پولیس کا ساتھ دیں۔ انہوں نے مزید کہا کہ حکومتی ہدایت مطابق ملتان میں مثالی امن یقینی بنانے کیلئے زیرو ٹالیرنس پالیسی ہے ، جس پر ہر صورت عملدرآمد کرایا جائے گا ۔
بعد ازاں ریجنل پولیس آفیسر نے ٹریفک پولیس افسران سے میٹنگ کی ۔ میٹنگ میں چیف ٹریفک آ فیسر محمد نعیم شاہد، ڈی ایس پی ہیڈکوارٹر طاہر مشتاق ودیگر افسران نے شرکت کی ۔ چیف ٹریفک آفیسر محمد نعیم شاہد نے آ ر پی او کو ٹریفک کی کاکردگی بارے تفصیل سے بریف کیا ۔
اس موقع پر آ ر پی او نے ٹریفک افسران کو اپنی کاکردگی مزید بہتر بنانے کی ہدایت کی ۔ کاکردگی نہ دکھانے والے ٹریفک افسران کے خلاف قانون کے مطابق کاروائی عمل میں لائی جائے گی ۔ ان کا کہنا تھا کہ شہریوں کی سہولت کے لیے زیادہ سے زیادہ ڈرائیونگ لائسنس بنائے جائیں ۔ انہوں نے شہریوں سے اپیل کی کہ وہ ٹریفک پولیس کی جانب سے اس سہولت سے فائدہ اٹھائیں اور ڈرائیونگ لائسنس بنواکر ذمہ دار شہری ہونے کا ثبوت دیں۔
