اسلام آباد،20جولائی (اے پی پی):وفاقی وزیر میاں جاوید لطیف نے کہا ہے کہ اگر سائفر کا بیانیہ جھوٹ تھا ،9 اور10مئی کے واقعات غلط اورپاکستان پرحملہ تھے تو ان واقعات کے تمام کرداروں پر ہاتھ کیوں نہیں ڈالاگیا، نواز شریف ایک ایسا طاقتورانجن ہے جو کمزور بوگیوں کو منزل سے ہمکنار اورملک کو آگے لے کر جاسکتا ہے۔
ان خیالات کا اظہار انہوں نے جمعرات کو یہاں پریس کانفرنس سے خطاب کرتے ہوئے کیا۔ انہوں نے کہا کہ پاکستان کے خلاف ہونے والی سازشیں دم توڑ رہی ہیں اگر پورا سچ بول دیا جائے تو ملک کے تمام مسائل حل ہو سکتے ہیں ۔ سائفر کے حوالے سے جو باتیں سامنے آرہی ہیں یہ کوئی نئی نہیں ہیں ۔ انہوں نے کہا کہ غیر ممالک کا نام لے کر اور لوگوں کی محرومیوں کا نام لے کر یہ سب کچھ کیا گیا ۔ انہوں نے کہ یہ سامنے لائےجانے والے لوگ پھر ریاست کے خلاف استعمال کئے جاتے ہیں ۔ ذولفقار علی بھٹو، نواز شریف اور عمران کےدرمیان کوئی مماثلت نہیں ہے ۔ انہوں نے کہا کہ بھٹو کو پھانسی پر چڑھایا گیا، نواز شریف کو جلاوطن کیا گیا اورعمران خان کو لا کر ریاست کو کمزور کیا گیا ۔
انہوں نے کہا کہ قومی سلامتی کونسل کے دونوں اجلاسوں میں سائفر کے حوالے سے کہا گیا کہ کہ کوئی سازش نہیں ہوئی مگر عمران خان پھر بھی سائفر والے بیانئے پر قائم رہے۔ جو بھی ریاست کا آئین توڑتا ہے بغاوت پر اکساتا ہے اور ریاست کو کمزور کرتا ہے تو اس پر آرٹیکل 6 لگنا چاہیئے۔ 2017 اور سائفر کے کردار ملتے جلتے ہیں ۔ ان سازشوں کے مقاصد اب کسی سے پوشیدہ نہیں رہے ۔ انہوں نے کہا کہ اعظم خان نے کوئی نئی بات نہیں کی ۔ اگر اس وقت سائفر کے حوالے سے آڈیو پر یقین کیا جارہا ہے تو دیگر آڈیوز پر بھی کاروائی ہونی چاہیئے ۔ سیاستدان تو ریاست پر قربان ہوتے آئے ہیں مگر ریاست ایک سیاستدان پر قربان ہوجائے یہ ہم نہیں ہونے دیں گے ۔ ان ساری سازشوں کے کرداروں کے خلاف کارروائی ہونی چاہیئے ۔
انہوں نے کہا کہ جو لوگ یہ سمجھتے ہیں کہ افراتفری اور خانہ جنگی کے علاوہ اب کوئی حل نہیں ہے وہ یہ جان لیں کہ اب بھی مسلم لیگ ن کا قائد ایک طاقت ور انجن ثابت ہوگا ، ادارے بھی یہ بات محسوس کر رہے ہیں کہ قوم کی حمایت کے ساتھ کمزور بوگیوں کو ایک طاقت ور انجن کے ساتھ جوڑا جائے تو ملک آگے جا سکتا ہے ۔ انہوں نے کہا کہ انصاف کے لئے ستمبر کا انتظار کرنا درست نہیں ۔ ریاست کو انصاف ملنا چاہیئے کیونکہ نواز شریف ہی ایک امید ہے ۔نواز شریف چوتھی مرتبہ وزیر اعظم بن کر سی پیک مکمل کریں گے اور اس کے ثمرات حاصل ہوں گے ۔ ایک سوال کے جواب میں انہوں نے کہا کہ اگر سائفر کا بیانیہ جھوٹ تھا اور 9 اور 10 مئی کو واقعات غلط اور پاکستان پر حملہ تھے تو اس کے تمام کرداروں پر ہاتھ کیوں نہیں ڈالا گیا ۔
