لاہور، 23 جولائی (اے پی پی):نگران وزیراعلیٰ پنجاب محسن نقوی کی زیر صدارت پنجاب کابینہ کا ہنگامی اجلاس اتوار کو یہاں وزیراعلیٰ آفس میں منعقد ہوا۔پنجاب کابینہ کے اجلاس میں سیلاب کی تازہ صورتحال اوربھارت کی جانب سے دریاؤں میں پانی چھوڑنے جانے کے حوالے سے تیاریوں اور حفاظتی انتظامات کاجائزہ لیاگیا۔
سیکرٹر ی آبپاشی نے بریفنگ میں بتایا کہ دریائے راوی اورستلج پر بھارت کے بنائے ڈیمزمیں پانی کی سطح بلندہورہی ہے اورراوی پر بنایاگیا ڈیم90فیصدجبکہ ستلج پر بنایاگیا ڈیم 70 فیصد بھرگیاہے۔کابینہ کو بریفنگ کے دوران بتایا گیا کہ راوی اورستلج کے کیچمنٹ ایریا میں مزید بارشوں کاامکان ہے اوربھارت راوی اورستلج میں مزید پانی چھوڑ سکتا ہے،جس سے دونوں دریاؤں میں سیلا ب کا خدشہ ہے۔
وزیراعلیٰ محسن نقوی نے سیلاب کی تازہ صورتحال اوربھارت کی جانب سے پانی چھوڑے جانے کے حوالے سے محکمہ آبپاشی،پی ڈی ایم اے،ریسکیو1122 اورانتظامیہ کو الرٹ رہنے کا حکم دیااوردریائے راوی اورستلج کے بیڈ کے اندر موجود آبادیوں کے بروقت انخلاء کیلئے پلان تیارکرنے کی ہدایت کی۔
وزیراعلیٰ محسن نقوی نے تمام کمشنرز کو ہنگامی بنیادوں پر حفاظتی انتظامات کا حکم دیتے ہوئے کہا کہ دریاؤں کے بیڈ کے اندر موجود گاؤں کے لوگوں کی حفاظت کیلئے تمام پیشگی اقدامات کو حتمی شکل دی جائے۔آبادیوں کے بروقت انخلاء کے حوالے سے کوئی کوتاہی یا غفلت کسی صورت برداشت نہیں کی جائے گی۔ کمشنر لاہور اوردیگر ڈویژنل کمشنر ایمرجنسی کی صورت میں وضع کردہ پلان پر عملدرآمد یقینی بنائیں۔انہوں نے ہدایت کی کہ انتظامیہ کھانے پینے اورمیڈیکل کی سہولتیں پہنچانے کیلئے موبائل ٹیمیں تشکیل دے۔
وزیراعلیٰ محسن نقوی نے دریاوں میں پانی کی صورتحال کو ہمہ وقت مانیٹر کرنے کا حکم دیا اورکہا کہ بھارت کی جانب سے چھوڑے گئے پانی کی آمد کے بارے میں متعلقہ اداروں کو لمحہ بہ لمحہ باخبر رکھا جائے۔
صوبائی وزراء،چیف سیکرٹری،انسپکٹر جنرل پولیس،ایڈیشنل آئی جی سپیشل برانچ،چیئرمین پلاننگ اینڈ ڈویلپمنٹ بورڈ اور متعلقہ حکام نے صوبائی کابینہ کے ہنگامی اجلاس میں شرکت کی جبکہ صوبائی وزیر ڈاکٹر جمال ناصر،مشیر کنور دلشاد،ایڈیشنل چیف سیکرٹری ساؤتھ پنجاب،تمام ڈویژنل کمشنرزاوردیگر حکام ویڈیولنک کے ذریعے اجلاس میں شریک ہوئے ۔
