لاہور،23اکتوبر (اے پی پی):وزیراعلی پنجاب محسن نقوی نے لاہور میں سرکاری سطح پر پہلے کینسر ہسپتال کی اصولی منظوری دے دی ہے اور اس ضمن میں پلان طلب کر لیا ہے۔
وزیر اعلی محسن نقوی نے مناواں ہسپتال کا دورہ کیا اورکینسر ہسپتال کے لئے مجوزہ اراضی اور ہسپتال کی عمارت کا معائنہ کیا۔وز یراعلی نے ہسپتال کی مرکزی عمارت سے ملحقہ بلڈنگ کاجائزہ لیا اور مناواں ہسپتال کو کینسر ہسپتال میں تبدیل کرنے کا ٹاسک دیا ۔
وزیراعلی محسن نقوی کی زیر صدارت مناواں ہسپتال کے کمیٹی روم میں اجلاس منعقد ہواجس میں کینسر ہسپتال کے امور کا جائزہ لیا گیا۔ وزیر اعلی محسن نقوی نے کہا کہ پنجاب 14 کروڑ عوام کا صوبہ ہے، ایک بھی سرکاری سٹیٹ آف دی آرٹ کینسر ہسپتال نہیں ہے، لوگ دھکے کھا رہے ہیں کینسر کے علاج کے لئے،سرکاری سطح پر اعلی معیار کا کینسر ہسپتال پنجاب کے عوام کی ضرورت ہے، کینسر کے مریضوں کو سرکاری سطح پر ایک سٹیٹ آف دی آرٹ ہسپتال مہیا کرنا حکومت کی ذمہ داری ہے۔
وزیراعلی نے کینسر ہسپتال کا ڈیزائن او ردیگر امور جلد طے کرنے کی ہدایت کرتے ہوئے کہاکہ مشینری او رآلات خریدنے کی بھی پلاننگ کی جائے۔
انڈس کے میاں احسن، چیف سیکرٹری،سیکرٹریز صحت، خزانہ، تعمیرات ومواصلات، سپیشل سیکرٹری ہیلتھ، وائس چانسلر کنگ ایڈورڈ میڈیکل یونیورسٹی اور متعلقہ حکام بھی اس موقع پر موجود تھے۔
