اسلام آباد،24اکتوبر (اے پی پی):نگران وزیراعظم انوار الحق کاکڑ نے ہدایت کی ہے کہ ہاکی کے کھلاڑیوں کو بین الاقوامی مقابلوں کی تیاری کے لئے ہر قسم کی سہولیات فراہم کی جائیں، ہاکی کو ایک مرتبہ پھر سے اس کا کھویا ہوا مقام دلائیں گے۔
ان خیالات کا اظہار انہوں نے ایشیا کپ اور ورلڈ کپ جیتنے والےپاکستان ہاکی ٹیم کے سابق کپتان اصلاح الدین صدیقی سے منگل کو گفتگو کرتے ہوئے کیا۔ ملاقات میں اصلاح الدین صدیقی نے وزیرِ اعظم کو اپنی سوانح عمری ‘‘ڈیش تھرو مائی لائف’’ پیش کی۔ ملاقات میں پاکستان میں ہاکی کی موجودہ صوتحال، اس کی بحالی اور فروغ کے لئے اقدامات پر گفتگو کی گئی۔ اصلاح الدین صدیقی نے گزشتہ شب ہاکی چیمپئن شپ کے اختتامی میچ میں وزیرِ اعظم کی شرکت پر ان کا شکریہ ادا کیا۔ اصلاح الدین صدیقی نے کھلاڑیوں کی حوصلہ افزائی پر وزیراعظم کی خصوصی تعریف کی۔
نگران وزیراعظم انوار الحق کاکڑ نے کہا کہ پاکستانی ہاکی ٹیم نے کئی دہائیوں تک ہاکی کے میدانوں میں ملک و قوم کا نام روشن کیا ہے، قومی کھیل ہاکی کی پاکستان میں موجودہ صورتحال تشویشناک ہے، پاکستان میں ہاکی کو ایک مرتبہ پھر سے اس کا کھویا ہوا مقام دلوا کر رہیں گے۔ انہوں نے کہا کہ اصلاح الدین صدیقی جیسے لیجنڈ پاکستان کے اصل ہیرو ہیں، حکومت نوجوانوں میں ہاکی کے فروغ کیلئے ہر ممکن اقدامات کرے گی۔ وزیراعظم نے ہدایت کی کہ ہاکی کے کھلاڑیوں کو بین الاقوامی مقابلوں کی تیاری کیلئے ہر قسم کی سہولیات فراہم کی جائیں۔
