فیصل آباد،30 اکتوبر (اے پی پی): گورنمنٹ کالج ویمن یونیورسٹی میں فلسطین میں انسانی حقوق کی خلاف ورزیوں پر احتجاجی ریلی نکالی گئی،جس کی قیادت وائس چانسلر پروفیسر ڈاکٹر ظل ہما نازلی نے کی، ان کے ہمراہ ممبر کونسل آف اسلامک آئیڈیالوجی این سی ایچ ڈی سابق ایم این اے ڈاکٹر سمیعہ راحیل قاضی،چیرمین رفاہ یونیورسٹی فیصل آباد ڈاکٹر مدثر، چیر مین شعبہ آئی آر جی سی یونیورسٹی فیصل آباد ڈاکٹر غلام مصطفی، کوآرڈ ینیٹر پروفیسر ڈاکٹر عائشہ سمین،پروفیسر ڈاکٹر صائمہ اکرم،ڈ ائریکٹر سٹوڈنٹس افیرز ڈاکٹر اسماعزیز نے ریلی میں شرکت کی۔
فلسطین میں مسلمانوں کے قتل عام اور مسلم امہ کے کردار پر سیمینار سے خطاب کرتے ہوئے ڈاکٹر سمیہ راحیل قاضی نے کہا کہ وہ اپنی جان کی پرواہ کیے بغیر اپنے مقصد کے حصول کیلئے ڈٹے ہوئے ہیں، فلسطین کے شہید حیات جاوداں پا چکے ہیں، اللہ نے ان کو موت کے آئینے میں اپنی معرفت دکھائی ہے ا ور ان کے ایمان اتنے مضبوط ہیں۔ انہوں نے مسلمانوں کو نصیحت کی کہ مایوسی شکست کا پیش خیمہ ہے، یقین سے عاری ہو کر منزلوں کی سمت چلنے سے کبھی منزل نہیں ملتی،زمانے میں ہمیشہ کامیابی انہی کے حصے میں آتی ہے جو اول دن سے اپنے ساتھ عزم مصمم لے کے چلتے ہیں۔
پروفیسر ڈاکٹر ظل ہما نازلی نے مسئلہ فلسطین کی موجودہ صورتحال اجاگر کرنے پر حاضرین محفل کا شکریہ ادا کیا اور عالمی برادری سے اس گھمبیر مسئلہ کے حل کیلئے سفارش کی۔ ڈاکٹر مدثر نے ایوان میں فلسطین کے حق میں اور اسرائیل کے خلاف مذمتی قرارداد پیش کی جس کو تمام ایوان نے قبول کیا۔
سیمینار اور احتجاجی ریلی میں یونیورسٹی سے اساتذہ اور طلبہ کی بڑی تعداد نے شرکت کی اور فلسطینیوں سے اظہار یکجہتی کا مظاہرہ کیا۔اس موقع پر طالبات نے اسرائیلی جارحیت اور فلسطین کی تباہ حالی کے موضوع پر پوسٹر بنا کر اپنے خیالات و جذبات کا اظہاربھی کیا۔
