لاہور،30 اکتوبر( اے پی پی ) وزیر اعلٰی پنجاب سید محسن نقوی کی ہدایت پر کوٹ لکھپت جیل کے 18 قیدیوں کی آنکھوں کی مئیو ہسپتال میں سرجری کامیاب ہو گئی۔نگران صوبائی وزیر صحت پروفیسر ڈاکٹر جاوید اکرم مئیو ہسپتال کے شعبہ امراض چشم پہنچ گئے۔اس موقع پر وائس چانسلر کنگ ایڈورڈ میڈیکل یونیورسٹی پروفیسر ڈاکٹر محمود ایاز، سی ای او مئیو ہسپتال پروفیسر ڈاکٹر ہارون حامد، ایم ایس پروفیسر ڈاکٹر احسن نعمان اور انچارج شعبہ امراض چشم پروفیسر ڈاکٹر معین موجود تھے۔نگران صوبائی وزیر صحت پروفیسر ڈاکٹر جاوید اکرم نے کیمپ جیل کے اٹھارہ قیدیوں سے آنکھوں کی کامیاب سرجری کے بعد ملاقات کی۔نگران صوبائی وزیر صحت پروفیسر ڈاکٹر جاوید اکرم نے کامیاب سرجری ہونے والے تمام قیدیوں کو پھولوں کے گلدستے پیش کئے۔نگران صوبائی وزیر صحت پروفیسر ڈاکٹر جاوید اکرم نے اس موقع پر اظہار خیال کرتے ہوئے کہا کہ وزیر اعلیٰ پنجاب سید محسن نقوی نے کچھ روز قبل کوٹ لکھپت جیل میں دورہ کے دوران قیدیوں کی آنکھوں کے علاج کی ہدایت کی تھی۔مئیو ہسپتال کے 4 رکنی سینئیر ڈاکٹرز کی ٹیم نے کوٹ لکھپت جیل میں قیدیوں کی آنکھوں کا معائنہ کیا۔ معائنہ کے بعد 20 مریضوں کو آنکھوں کی سرجری کیلئے مئیو ہسپتال میں داخل کر لیا گیا۔آج بیس میں سے اٹھارہ قیدیوں کی آنکھوں کی کامیاب سرجری ہو چکی ہے۔انہوں نے کہا کہ آنکھوں کی کامیاب سرجری کروانے والے تمام قیدی علاج کی سہولیات سے سو فیصد مطمئن ہیں۔ قیدیوں کی آنکھوں کی کامیاب سرجری اور بہتر طبی سہولیات فراہم کرنے کیلئے وائس چانسلر پروفیسر ڈاکٹر محمود ایاز، پروفیسر ڈاکٹر ہارون حامد، پروفیسر ڈاکٹر معین اور پروفیسر ڈاکٹر احسن نعمان کو شاباش اور مبارکباد دیتا ہوں۔
