ملتان، 09 نومبر (اے پی پی):گورنر پنجاب و چانسلر محمد بلیغ الرحمن نے کہا ہے کہ ہمیں مستقل مزاجی اور جدید علوم کے حصول کے ساتھ آگے بڑھنا ہے۔
ان خیالات کااظہارانہوں نے ایمرسن یونیورسٹی میں طلباءو طالبات میں لیپ ٹاپ تقسیم کرنے کی تقریب سے خطاب کے دوران کیا۔گورنرپنجاب نے مزیدکہا کہ یونیورسٹیز میں میرٹ کی بنیاد پر لیب ٹاپز دئیے جارہے ہیں۔طلباءکے ہاتھ میں لیب ٹاپ آنے سے جدید دور کا آغاز ہو۔لاکھوں کی تعداد میں طلبہ وطالبات کو لیب ٹاپ دئیے گئے۔انہوں نے کہا کہ لیب ٹاپ سے نوجوانوں نے ای کامرس اور ای روزگار کے مواقع حاصل کئے۔لیب ٹاپ ہمارے نوجوان کی ترقی کا راستہ ہے۔
انجینئربلیغ الرحمن نے کہا کہ ہمیں مایوسی اور نفرتیں پھیلانے والوں سے دور رہنا ہے، ہمیشہ مثبت سوچیں، ہمیشہ تحقیق کرکے ووٹ دیں۔ انہوں نے کہا کہ ہمیشہ منطق اور دلائل سے بات کریں۔ ایک دوسرے کی رائے کا احترام کریں اورایک دوسروں کو برداشت کریں۔گورنرپنجاب نے کہاکہ آپ سب نے مختلف شعبوں میں جاکر لیڈر بننا ہیں۔ لیڈر ہمیشہ ایک دوسرے کا احترام کرتے ہیں۔ لیڈر کسی دوسرے پر غلط الزامات نہیں لگاتے۔انہوں نے کہا کہ ہمیں علامہ اقبال کے نظریات پر چلنا ہے۔ ہمارے مقاصد اعلیٰ ہونے چاہئیں۔
وائس چانسلر ایمرسن یونیورسٹی پروفیسر ڈاکٹر محمد رمضان نے تقریب سے خطاب کرتے ہوئے کہاکہ ایمرسن یونیورسٹی کو جدید خطوط پر استوار کیا جارہا ہے۔ ایمرسونین اور مخیر حضرات کے تعاون سے یونیورسٹی میں بہترین کام کر وائے گئے ہیں۔
تقریب کے اختتام پر گورنرپنجاب نے طلباءوطالبات میں لیپ ٹاپ تقسیم کیے۔ بعدازاں گورنر پنجاب محمد بلیغ الرحمن نے ایمرسن یونیورسٹی کے لوگو کی نقاب کشائی کی۔اس موقع پر انہوں نے الغازی ہال، ایس ایم ڈی، کھیلوں کے گراونڈ اور میچ کا بھی افتتاح کیا۔
