لاہور، 13 جنوری(اے پی پی): نگران صوبائی وزیر صحت پروفیسر ڈاکٹر جاوید اکرم نے کہا ہے کہ پنجاب کا نظام صحت باقی صوبوں کی نسبت بہت بہتر ہے۔ تاریخ میں پہلی بار پنجاب کے نظام صحت میں بہتری لانے کیلئے اتنی توجہ دی جا رہی ہے۔ انھوں نے کہا کہ سرکاری ہسپتالوں میں آنے والے مریضوں کو بہترین طبی سہولیات کی فراہمی اولین ترجیحات میں شامل ہیں۔
ا ن خیالات کا اظہار وزیر صحت پروفیسر ڈاکٹر جاوید اکرم نے ہفتہ کو یہاں مقامی ہوٹل میں پانچویں وائس چانسلرز، پرنسپلز اور ایم ایس کانفرنس میں بطور مہمان خصوصی خطاب کرتے ہوئے کیا۔ کانفرنس کے دوران تمام سرکاری ٹیچنگ ہسپتالوں کی کارکردگی کا تفصیلی جائزہ لیا گیا۔
پروفیسر ڈاکٹر جاوید اکرم نے کہا کہ نگران وزیر اعلیٰ پنجاب سید محسن نقوی کے ویژن کے مطابق تمام کارڈیالوجی ہسپتالوں میں مریضوں کو پرائمری انجیو پلاسٹی کی سہولت کی فراہمی گیم چینجر ثابت ہوئی ہے۔ انھوں نے کہا کہ سرکاری ہسپتالوں کے ذمہ داران سے ہمیں بہت امیدیں وابستہ ہیں۔
پروفیسر ڈاکٹر جاوید اکرم نے کہا کہ پنجاب ہیلتھ کیئر کمیشن کو اتائیوں کے خلاف بلاامتیاز کارروائی کا حکم دیا گیا ہے۔ پنجاب میں اتائیوں کی بھرمار نظام کی کمزوری ہے۔ اتائی ڈاکٹرز معصوم انسانیت کے ساتھ کھیل رہے ہیں۔ انہوں نے کہا کہ سرکاری ہسپتالوں میں ڈاکٹرز ہر آنے والے مریض کو اپنا گھر کا فرد سمجھ کر اس کا علاج و معالجہ کریں۔ ایک سرکاری ہسپتال میں سربراہ کی کمزوری کی وجہ سے مسائل پیدا ہوتے ہیں۔ سرکاری ہسپتالوں میں مریضوں کے علاج و معالجہ کیلئے گائیڈ لائنز اور پروٹوکولز ہونے چاہئیں۔
پروفیسر ڈاکٹر جاوید اکرم نے کہا کہ پنجاب کے سو سے زائد سرکاری ہسپتالوں میں ری ویمپنگ کا منصوبہ کامیابی سے جاری ہے۔ اس وقت کارڈیالوجی ہسپتالوں میں بیس ہزار سے زائد مریضوں کی پرائمری انجیو پلاسٹی کر چکے ہیں۔ پنجاب کے مختلف سرکاری ہسپتالوں کا دورہ کرکے طبی سہولیات کا جائزہ لیا جا رہا ہے۔ انھوں نے ہدایت دی کہ تمام سرکاری ہسپتالوں کے ہیلتھ پروفیشنلز کی ویکسینیشن مکمل کروائیں۔
پروفیسر ڈاکٹر جاوید اکرم نے کہا کہ پنجاب میں صحت سہولت پروگرام کے ذریعے عوام کو بلا تعطل سہولت دی جارہی ہے۔ سرکاری ہسپتالوں میں آنے والا ہر مریض ہمارے لئے وی وی آئی پی ہے سرکاری ہسپتالوں میں ایچ آر مکمل کرنے کی پوری کوشش کررہے ہیں۔ پنجاب کی عوام کو صحت کی بہتر سہولیات فراہم کرنے کیلئے کوشاں ہیں۔ سرکاری ہسپتالوں میں آنے والے مریضوں کیلئے آسانیاں پیدا کی جا رہی ہیں۔
کانفرنس میں سیکرٹری صحت پنجاب علی جان خان، سپیشل سیکرٹری راجہ منصور احمد، ایڈیشنل سیکرٹریز زاہدہ اظہر، شاہدہ فرخ، محمد وسیم، آغا نبیل، ڈاکٹر عاصم الطاف، چیف پلاننگ آفیسر عبدالحق بھٹی، ڈپٹی سیکرٹریز و دیگر حکام نے شرکت کی۔
کانفرنس میں وائس چانسلر فاطمہ جناح میڈیکل یونیورسٹی پروفیسر ڈاکٹر خالد مسعود گوندل، وائس چانسلر کنگ ایڈورڈ میڈیکل یونیورسٹی پروفیسر ڈاکٹر محمود ایاز، وائس چانسلر یونیورسٹی آف چائلڈ ہیلتھ سائنسز پروفیسر ڈاکٹر مسعود صادق، وائس چانسلر نشتر میڈیکل یونیورسٹی، وائس چانسلر فیصل آباد میڈیکل یونیورسٹی پروفیسر ڈاکٹر ظفر چوہدری، وائس چانسلر راولپنڈی میڈیکل یونیورسٹی پروفیسر ڈاکٹر عمر اور وائس چانسلر یونیورسٹی آف ہیلتھ سائنسز پروفیسر ڈاکٹر احسن وحید راٹھور نے بھی شرکت کی۔
کانفرنس میں پرنسپل امیر الدین میڈیکل کالج پروفیسر ڈاکٹر سردار ظفر الفرید، پرنسپل علامہ اقبال میڈیکل کالج پروفیسر ڈاکٹر عائشہ عارف، پرنسپل سروسز انسٹی ٹیوٹ آف میڈیکل سائنسز پروفیسر ڈاکٹر زوہرہ خانم، ایگزیکٹو ڈائریکٹر پنجاب انسٹی ٹیوٹ نیورو سائنسز پروفیسر ڈاکٹر آصف بشیر و دیگر پرنسپلز بھی شریک ہوئے۔
