لاہور ،18 جنوری ( اے پی پی ): ٹریڈ ڈویلپمنٹ اتھارٹی آف پاکستان کے چیف ایگزیکٹو آفیسر محمد زبیر موتی والا نے جمعرات کو یہاں ایکسپو سینٹر جوہر ٹاﺅن میں تیسرے سالانہ انجینئرنگ اینڈ ہیلتھ کیئر شو کا افتتاح کر دیا جس میں 60 ممالک کے 400 سے زائد وفود نے شرکت کی۔
افتتاحی تقریب سے خطاب کرتے ہوئے زبیر موٹی والا نے تاریخی شہر لاہور میں بیرون ممالک سے آنے والے معزز مہمانوں کو خوش آمدید کہا۔ انہوں نے کہاکہ ہم 30 بلین ڈالر کی ایکسپورٹ کر رہے ہیں جسے ہم 60 بلین ڈالرز تک لے کر جائیں گے۔ انہوں نے کہاکہ پاکستان میں کاروبار کیلئے فضاءسازگار ہے،انجینئرنگ اینڈ ہیلتھ کیئر شو کا مقصد بیرون ممالک اور مقامی تاجروں کو ایک پلیٹ فارم مہیا کرنا ہے تاکہ وہ یہاں آ کر خود پاکستانی مصنوعات کی کوالٹی چیک کر سکیں۔
انہوں نے کہا کہ اس طرح کے شوز کے انعقاد سے پاکستان کا سافٹ امیج دنیا کے سامنے آئے گا اور ہمارے ملک کی برآمدات میں اضافہ ہو گا۔انہوں نے کہا کہ پاکستان کے خلاف پروپیگنڈا کرنے والے دیکھ لیں کہ ہمارے ملک میں پرامن اقتصادی سرگرمیاں جاری ہیں۔ انہوں نے کہاکہ پاکستان میں کاروبار اور سرمایہ کاری کے لحاظ سے بڑا پوٹینشل ہے اور یہاں کے لوگ بہت محنتی اور جفاکش ہیں۔
انہوں نے کہا کہ مختلف شعبہ جات میں 300 سے زائد پاکستانی کمپنیوں نے اس نمائش میں اپنی مصنوعات پیش کیں جس میں فرنیچر، ،کھیلوں کے لباس و سامان، فارماسیوٹیکل، سرجیکل آلات، انجینئرنگ آلات،آٹو سیکٹر شامل ہیں۔ یہ ایکسپو ایک سورسنگ پلیٹ فارم مہیا کرتی ہے جس میں بنیادی اشیا سے لے کر انتہائی تخلیقی اور معیاری مصنوعات کی وسیع رینج شامل ہے۔انہوں نے کہا کہ پاکستانی مصنوعات کی عالمی مارکیٹوں میں بہت زیادہ طلب ہے۔ امید ہے کہ اس ایکسپو سے غیر ملکی خریداروں سے بڑے آرڈر مل سکیں گے۔
انہوں نے کہا کہ ٹریڈ ڈویلپمنٹ اتھارٹی آف پاکستان برآمدی مصنوعات بنانے والوں کو ہر ممکن سہولیات فراہم کر رہی ہے۔ انہوں نے کہا کہ وہ بزنس ٹائیکونز کے ساتھ میٹنگز بھی کریں گے تاکہ غیر ملکی سرمایہ کاروں کے لیے حکومت کی طرف سے دیئے گئے خصوصی پیکیج کا فائدہ اٹھایا جا سکے۔اس موقع پر مختلف غیر ملکی کمپنیوں کے ساتھ ایم او یوز بھی طے پائے۔ یاد رہے یہ شو 20 جنوری تک ایکسپو سینٹر لاہور میں جاری رہے گا۔
