اسلام آباد،25جنوری (اے پی پی): آئی جی موٹروے پولیس سلمان چوہدری نے جمعرات کو بطور انسپیکٹر جنرل موٹروے پولیس چارج سنبھالنے کے بعد نارتھ ریجن کا دورہ کیا اور ہدایات دیں کہ موٹروے پولیس کے دائرہ اختیار میں آنے والی تمام شاہراہوں پر بلا تفریق قانون کا نفاذ عمل میں لایا جائے۔
موٹروے پولیس کے چاک و چوبند دستے نے آئی جی کو سلامی پیش کی جب کہ ڈی ائی جی نارتھ اشفاق احمد نے آپریشنل و انتظامی امور پر آئی جی موٹروے کو بریفنگ دی۔
آئی جی موٹر وے پولیس نے ہدایت کی کہ ٹریفک ڈسپلن قائم کرنے اور بلا تفریق قانون کا نفاذ عمل میں لایا جائے اور روڈ یوزر کے سفر کو مزید محفوظ بنانے کے لیے بھرپور اقدامات اٹھائے جائیں اور بروقت مدد کی فراہمی کو یقینی بنایا جائے ۔
انہوں نے کہا کہ دیانت داری ایمانداری اور خوش اخلاقی موٹروے پولیس کا شعار ہے جس پر افسران و ملازمان کاربند رہیں علاوہ ازیں عوام الناس کو ٹریفک قوانین کی آگاہی کے لیے زیادہ سے زیادہ روڈ سیفٹی ایکٹیویٹیز کا انعقاد کیا جائے۔
آئی جی نے ہدایات دیں کہ محکمانہ پروموشن اور آپریشنل ضروریات کو پورا کرنے کیلئے ترجیح بنیادوں پرعملی اقدامات اٹھائیں جائیں گے ۔
