لاہور ،26 جنوری (اے پی پی): آئی جی پنجاب ڈاکٹر عثمان انور نے ڈی پی او، ڈی جی خان، اور انکی ٹیم سے ملاقات کی۔ آئی جی پنجاب نے جھنگی چیک پوسٹ سے کالعدم تنظیم کے دہشت گردوں کے داخلے کی کوشش ناکام بنانے پر پولیس ٹیم کو شاباش دی۔
آئی جی پنجاب نے کہا کہ پولیس ٹیم کی فرض شناسی اور ہائی الرٹ کاروائی نے دہشت گردوں کے مذموم مقاصد کو ناکام بناتے ہوئے پسپائی پر مجبور کیا۔ انھوں نے کہا کہ دہشت گردوں کے سامنے سیسہ پلائی دیوار پنجاب پولیس کے سرحدی جانباز فورس کے اصل ہیروز ہیں ۔ ڈی پی او احمد محی الدین نے گذشتہ مہینوں کے دوران ڈی جی خان پولیس کی کارکردگی اور درپیش چیلنجز بارے بریفنگ دی۔
بریفنگ میں بتایا گیا کہ ڈی جی خان پولیس خطرناک ڈکیتوں ، دہشت گردوں اور اسمگلنگ میں ملوث عناصر کے خلاف انٹیلی جنس بیسڈ آپریشنز جاری رکھے ہوئے ہے ۔ ڈیرہ غازی خان کے تمام تھانوں کو سپیشل انیشئیٹو پروٹوکول پر منتقل کر دیا گیا ۔
ڈی پی او احمد محی الدین نے بتایا کہ انسداد جرائم کے ساتھ ساتھ جدید ٹیکنالوجی کے موثر استعمال سے پبلک سروس ڈلیوری کو شہریوں کیلئے مزید آسان اور بہتر بنایا گیا ہے ۔ آئی جی پنجاب نے ڈی جی خان پولیس کے ڈی ایس پیز اور ایس ایچ اوز سے انکی کارکردگی اور ٹریس ہونے والے اہم کیسز بارے گفتگو بھی کی۔
