اسلام آباد،29 جنوری (اے پی پی):ملک کے بالائی علاقوں میں موسم سرما کی پہلی برفباری کا آغاز ہو گیا ہے۔کالام میں 10 انچ ، مالم جبہ 08،استور اور مری میں ایک ایک انچ برفباری ریکارڈ ہوئی ہے۔برفباری کے باعث آمدورفت متاثر ہونے کاخدشہ ہے، محکمہ موسمیات نے سیاحوں کو محتاط رہنے کی ہدایت کی ہے۔
پیر کے روز بھی گلگت بلتستان ، بالائی خیبر پختونخوا ، کشمیراور ملحقہ پہاڑی علا قوں میں بارش اور پہاڑوں پر برفباری کا امکان ہے۔ پنجاب اور بالائی سندھ کے بعض میدانی علاقوں میں ہلکی سے درمیانی دھند چھائی رہے گی۔
گزشتہ 24 گھنٹوں کے دوران ملک کے بیشتر علاقوں میں موسم سرداور مطلع جزوی ابر آلود رہا۔ تاہم خیبر پختونخوا ، کشمیر ، اسلام آباد، خطہ پوٹھوہار اور گلگت بلتستان میں بارش ہوئی ۔ پنجاب اور بالائی سندھ کے بعض میدانی علاقے دھند /سموگ کی لپیٹ میں رہے۔
سب سے زیادہ بارش اپر دیر میں 45 ، پٹن 34، پارا چنار 28، کالام 22، مالم جبہ19 اور راوالاکوٹ میں 10 میٹر بارش ریکارڈ ہوئی۔
آج ریکارڈ کیے گئے کم سے کم درجہ حرارت کے مطابق کالام میں منفی 06، مالم جبہ، گوپس منفی 04 ، استور اور ہنزہ میں منفی 03 ڈگری سینٹی گریڈ ریکارڈ کیا گیا۔
