لاہور، 31جنوری(اے پی پی): وزیراعلیٰ محسن نقوی کی قیادت میں پنجاب حکومت نے ایک اورسنگ میل عبور کرلیا، اسلحہ لائسنس کے اجراء میں کرپشن کا مستقل خاتمہ کرتے ہوئے آ ن لائن اسلحہ لائسنس کیلئے محکمہ داخلہ پنجاب اورنادرا کے درمیان”دی پنجاب آرمز لائسنس مینجمنٹ سسٹم‘”(پی اے یل ایم ایس( کا معاہدہ طے پاگیا۔
وزیراعلیٰ محسن نقوی نے “دی پنجاب آرمز لائسنس مینجمنٹ سسٹم‘” پورٹل کاباقاعدہ افتتاح کیا جس کے تحت پنجاب بھر میں اسلحہ لائسنس کی تجدید اور ترمیم کرائی جاسکے گی۔ پنجاب آرمز لائسنس مینجمنٹ سسٹم کے تحت اسلحہ لائسنس کی ورثا کو منتقلی بھی آن لائن کی جائے گی۔پنجاب آرمز لائسنس مینجمنٹ سسٹم کے تحت اسلحہ لائسنس درخواست دہندہ کے گھر ڈلیور کیاجائے گا۔
وزیراعلیٰ پنجاب محسن نقوی نے کہا کہ اس سسٹم کے نفاذ سے لائسنس کے اجراءمیں کرپشن کا مکمل سدباب ممکن ہوگا۔وزیراعلیٰ محسن نقوی نے دی پنجاب آرمز لائسنس مینجمنٹ سسٹم کے اجراء پر سیکرٹری داخلہ میاں شکیل احمد اور ایڈیشنل سیکرٹری داخلہ (جوڈیشل) ڈیپارٹمنٹ فروا عامر کی خدمات کو سراہتے ہوئے اس خود کار سسٹم کے تحت اسلحہ لائسنس کے اجراءکو قابل تحسین قرار دیا۔
معاہدہ پر سیکرٹری داخلہ حکومت پنجاب اور ڈی جی نادرا نے دستخط کئے۔ چیف سیکرٹری، سیکرٹری داخلہ،ڈائریکٹر جنرل نادراسہیل جہانگیر، ڈائریکٹر آرمز نادرا اور متعلقہ حکام بھی اس موقع پرموجود تھے۔
