اسلام آباد، 5فروری(اے پی پی): وزیراعظم آزادکشمیر چوہدری انوارالحق نے یوم یکجہتی کشمیر کے موقع پر خصوصی پیغام میں کہا ہے کہ 5 فروری یوم یکجہتی کشمیر اہل پاکستان اور اہل کشمیر کے لازوال رشتے، مذہبی،ثقافتی اورسماجی ہم آہنگی کی پہچان ہے۔انہوں نے کہا کہ کشمیری مسلمانوں نے قیام پاکستان سے قبل ہی اپنا مستقبل نظریاتی طور پر پاکستان کے ساتھ وابستہ کر دیا تھا اور ہمیں اس تاریخی فیصلے پر فخر ہے۔
وزیراعظم آزادکشمیر چوہدری انوارالحق نے کہا کہ اہل پاکستان نے آزمائش اور مشکل کی ہر گھڑی میں کشمیری عوام کا ساتھ دیا، میں اپنے مقبوضہ کشمیر کے بھائیوں کو یقین دلاتا ہوں کہ پاکستان اور آزادکشمیر کے عوام آپ کی پشت پر ہیں، وہ وقت دور نہیں کہ جب مقبوضہ کشمیر کے عوام آزادی کی نعمت سے ہمکنار ہوں گے،
انہوں نے کہا کہ پاکستان خطے میں امن کا خواہش مند ہے، جبکہ ہندوستان اس خطے میں دہشتگردی کا ماسٹر مائنڈ ہے، ہندوستانی حکومت کے انتہاء پسندانہ اقدامات نے خطے کا امن خطرے میں ڈال دیا ہے۔
وزیراعظم آزادکشمیر چوہدری انوارالحق نے کہا کہ مقبوضہ کشمیر میں قابض بھارتی فوج کے ہاتھوں انسانی حقوق کی سنگین پامالیوں پرہندوستان کی شدید مذمت کرتے ہیں ، اقوام عالم سے مطالبہ کرتا ہوں کہ وہ مقبوضہ کشمیر میں بھارتی فوج کے ہاتھوں انسانی حقوق کی سنگین پامالیاں بند کروائیں ،ہندوستان کے یکطرفہ اقدامات سے اقوام متحدہ کی قراردادوں سے انحراف کسی طور ممکن نہیں۔ ان شاء اللہ وہ دن دور نہیں جب مقبوضہ کشمیر بھارتی استبدادسے آزادہوگا اور ریاست جموں و کشمیر کا الحاق پاکستان کا خواب شرمندہ تعمیر ہوگا۔
