اسلام آباد، 12 مارچ (اے پی پی ):جام کمال خان نے وفاقی وزیر تجارت کا عہدہ سنبھال لیا ہے ، جام کمال خان نے باضابطہ طور پر وفاقی وزیر تجارت کے طور پر اپنی ذمہ داریاں سنبھالیں۔ وفاقی سیکرٹری تجارت کیپٹن (ر) محمد خرم آغا نے وزارت آمد پر ان کا استقبال کیا۔
اس موقع پر انہیں وزارت کے دائرہ کار اور مقاصد کے بارے میں بریفنگ دی گئی ۔ وفاقی وزیر جام کمال خان نے سرمایہ کاری اور مقامی اور غیر ملکی سرمایہ کاروں کو مکمل طور پر سہولت فراہم کرنے کا عزم کیا اور کہا کہ وزیراعظم شہباز شریف کی قیادت میں ملک کو درپیش معاشی چیلنجز پر قابو پانے کا پختہ عزم لے کر آئے ہیں ، تجارت کے حجم کو بڑھائیں گے اور خاص طور پر کان کنی، لائیو سٹاک، اور ٹیکسٹائل جیسے اہم شعبوں میں جدت لائیں گے۔
وفاقی وزیر تجارت جام کمال خان نے کہا کہ عالمی معیارات سے ہم آہنگ ہونے اور جدید طریقوں کو اپنانے کی اشد ضرورت ہے، روایتی تجارتی نقطہ نظر سے آگے بڑھنے اور عالمی منڈی میں پاکستان کی پوزیشن کو بہتر بنانے کے لیے فعال اقدامات کو اپنانے کی ضرورت ہے۔ انہوں نے کہا کہ میری بات سابق وزیر تجارت ڈاکٹر گوہر اعجاز سے ہوئی، ہم دونوں نے تجارتی برادری اور حکومت کے درمیان قریبی تعلقات قائم کرنے کی اہمیت پر اتفاق کیا ہے ۔
واضح رہے کہ جام کمال خان کا تعلق این اے 257 لسبیلہ سے ہے اور وہ سابق وزیر اعلیٰ بلوچستان رہ چکے ہیں۔
