لاہور13مارچ:( اے پی پی ) وزیر اعلیٰ پنجاب مریم نواز شریف کی زیر صدارت ٹورازم اور مذہبی سیاحت کے فروغ کے لیے اعلیٰ سطح کا اجلاس ہوا۔صوبائی سیکرٹری سیاحت نے ٹورازم اور مذہبی سیاحت کے بارے میں بریفنگ دی۔وزیر اعلیٰ مریم نواز شریف نے سات روز میں جامع ”پنجاب ٹورازم پلان“ طلب کر لیااور پنجاب بھر میں ٹورسٹ سائٹ کی میپنگ کرنے کا حکم دے دیا۔وزیر اعلیٰ نے پنجاب میں مذہبی سیاحت کے لئے موجود مقامات کی میپنگ کی ہدایت بھی کی اور وساکھی میلہ منانے کی منظوری دے دی۔اجلاس سے خطاب کرتے ہوئے وزیر اعلیٰ پنجاب نے کہا کہ پنجاب کو پانچ سال میں ٹورازم حب بنانے کا ہدف پورا کیا جائے گا۔ ٹورازم کے فروغ کے لئے قلیل المدتی اور طویل المدتی حکمت عملی ترتیب دی جائے۔ انہوں نے کہا کہ پنجاب میں آنے والے سکھوں اور دیگر مذاہب کے پیروکاروں کو مکمل ٹورسٹ پیکیج دیا جائے گا، ہر سیاح کو انٹرنیشنل لیول کی سہولیات دینے کے لئے جامع پلاننگ کی جائے،سیاحت کے لئے آنے والے ہر فرد کو مکمل سیکورٹی حکومت کی ذمہ داری ہے۔ وزیر اعلیٰ مریم نواز شریف نے سکھ یاتریوں کے لئے مقدس مقامات کی نشاندہی اور ڈویلپمنٹ کے لئے پلان بنانے کی ہدایت کی۔
صوبائی وزیر اقلیتی امور رمیش سنگھ اروڑا نے وزیر اعلیٰ مریم نواز شریف کے منصب سنبھالنے پر دنیا بھر کی سکھ برادری کے خیرسگالی پیغامات سے آگاہ کیا۔سینئر صوبائی وزیر مریم اورنگزیب، صوبائی مشیر پرویز رشید، صوبائی وزیر برائے اقلیتی امور رمیش سنگھ اروڑا، سیکرٹری سیاحت، سیکرٹری اوقاف، سیکرٹری داخلہ،ایم ڈی ٹی ڈی سی پی، ڈی جی آرکیالوجی، جی ایم آپریشنز اور دیگر متعلقہ حکام نے شرکت کی۔
